كشف الإعلامي إبراهيم عبد الجواد عن حقيقة ما تم تداوله مؤخراً بشأن اهتمام النادي الأهلي بضم خالد عوض، ظهير أيمن طلائع الجيش. وأكد عبد الجواد أنه تواصل مع ثلاثة أطراف (الأهلي، الطلائع، وبيئة اللاعب) والذين نفوا جميعاً وجود أي مفاوضات، معلقاً: “مفيش حتى كلمة صباح الخير”.
وقال عبد الجواد، في تصريحات تليفزيونية عبر قناة” أون سبورت”: “انتشرت على السوشيال ميديا خلال الساعات اللي فاتت بعض الأخبار عن إن خالد عوض واحد من اللعيبة اللي الأهلي بيتارجتها (Target) أو واحد من اللعيبة الأهلي ممكن يكون عايزها خلال الفترة اللي جاية، هو خالد عوض الباك اليمين بتاع فريق طلائع الجيش”.
و أردف:” واحنا استفسرنا من ثلاث أطراف: طرف مقرب من اللاعب، وطرف طلائع الجيش، وطرف النادي الأهلي، والثلاثة أنكروا تماماً صحة هذه الأخبار وقالوا إن ما فيش أي تواصل، حتى في حد من غير ذكر أسماء قال لك: “ولا حتى في صباح الخير”، يعني ما فيش أي حاجة اتقالت عن القصة دي”.
و أشار عبد الجواد:” خاصة إن الأهلي عنده المركز ده فيه محمد هاني، فيه أحمد عيد القادم من المصري، وفيه عمر كمال لما يرجع من الإعارة، وهعرض لحضراتكم الخريطة بتاعة المعارين كلهم دلوقتي بحالتهم، عندك الأسيوطي الناشئ الصغير، فبالتالي عندك
عمر كمال عبد الواحد فمش محتاجين دلوقتي في هذا المركز”.
وشدد: “طيب الأهلي بيفكر إزاي في قصة المهاجم؟ بص يا سيدي، الأهلي عنده ثلاث أسماء، والعجيب الغريب في الأمر إنك تحس إن بيحصل لك “ديجافو” كده، بترجع بآلة الزمن ليناير اللي فات وربما الصيف اللي فات، لأن هي تقريباً نفس الأسماء”.
و أضاف عبد الجواد: “تلاقي أسد الحملاوي اللي بيلعب في رومانيا، وهتلاقي سفيان بن جديدة (يمكن ده الاسم اللي أضيف جديد، ده هداف الدوري المغربي بيلعب في المغرب الفاسي، ومن المفترض إنه يطلب فيه حوالي 2.5 مليون دولار، عنده 24 سنة ولعيب جامد جداً)’.
و استرسل:” وعندك أسد الحملاوي بيلعب في رومانيا وكان ارتبط اسمه بالأهلي في فترة سابقة تحديداً في يناير الماضي، وعنده شرط جزائي يقترب من المليون دولار. وعندك كمان نذير بن بوعلي الجزائري، ده يمكن أكبرهم سناً بيلعب في غيور المجري، وده واحد من اللعيبة اللي مقتنع بيهم جداً الكابتن سيد عبد الحفيظ وكان قاب قوسين أو أدنى إنه يجي الأهلي في يناير اللي فات ولكن تعرقلت الأمور وساعتها الأهلي جاب كاموتش، ولكن بقت الاتصالات مفتوحة ما بينه وما بين الكابتن سيد عبد الحفيظ”.
وزاد عبد الجواد: “ودول الثلاث أسماء حتى هذه اللحظة اللي على رادار الأهلي، ربما يكون واحد فيهم هو الأقرب إنه يدعم صفوف الأهلي خلال الانتقالات الصيفية في مركز المهاجم: سفيان بن جديدة المغربي، أحمد نذير بن بوعلي الجزائري، وأسد الحملاوي الفلسطيني”.
و أكمل:” فيما يخص الـ (Scouting) تم الإعلان عن الكابتن أنيس بوجلبان، وأنيس بوجلبان هو الوحيد اللي سيتم إعلان اسمه فيما يخص قيادة فريق السكاوتنج، الباقي بقى الأهلي بيسن سنة جديدة الفترة اللي جاية وهي إنه عايز يكون فريق سكاوتنج كبير (15 فرد) يشتغلوا في مصر ويشتغلوا في أفريقيا ويبقوا دايماً طول الوقت عاملين ملفات للعيبة والمراكز اللي الأهلي ممكن يستعين بيها مع إمضاء الفريق ده والـ 15 فرد دول على بند السرية وعدم الإفصاح، إن ما حدش يعرف إنهم شغالين جوه الأهلي عشان يبعدوا أي عيون إعلامية عنهم تماماً، فيبقى عندهم سهولة ويسر في التحرك وفي إنهم يتابعوا لعيبة وما حدش يلقطهم أو يصورهم”.
وانهى:’دلوقتي الأهلي بيشتغل بفكر مختلف فيما يخص موضوع السكاوتنج، الدكتور عصام سراج الدين ابتدى مهام عمله بشكل رسمي، وهيتم الإعلان رسمياً بعد نهاية آخر لقاء أمام المصري، الملفين اللي شغال عليهم دلوقتي: تسويق ثلاثة من المحترفين (أشرف داري، نجيك جراديشار، ورضا سليم).التعاقد مع مدير فني أجنبي جديد لقطاعات الناشئين”.
