كشف حسين لبيب رئيس نادي الزمالك ،عن مصير معتمد جمال. المدير الفني للفريق الاول لكرة القدم بالنادي، وكذلك جون إدوارد المدير الرياضي.
وقال لبيب في تصريحات متلفزة عبر برنامج “الحكاية”، على قناة” ام بي سي مصر”:” إحنا أخدنا قرار بحجب الفانلة رقم 1 لجماهير الزمالك العظيمة، محدش هيلبسها، والجمهور هو اللي هيلبسها لأنها تيشرت خاص بيهم، تقديرًا وعرفانًا بالجميل واللي عملوه واستحملوا كتير “.
واجاب ردا على سؤال كابتن معتمد جمال مكمل ولا لأ؟:” معتمد جمال كسبان دوري وابن من أبناء الزمالك ومكمل معانا، والناس بتحب تسمع أخبارنا لكن بلاش أخبار مضروبة”.
وبشأن مستقبل جون إدوارد أكد لبيب:” جون إدوارد مكمل معانا، والزمالك أخد الأولوية إنه يعين مدير رياضي بصلاحيات كاملة بالتعاون مع المجلس، ومفيش حد غيره بيتكلم في الكرة إعلاميًا، لأن عندنا مدير رياضي هو المسؤول عن الملف ده”.
و أردف: “جون تعب جدًا معانا، وكنا واعدينه بميزانية معينة وما أخدش نصها، ومع ذلك قدر يحقق شغل كويس جدًا، وبوجه له الشكر والتحية لأنه واقف معانا وقفة رجالة”.
وأستأنف :” إحنا بنفك القيد، ولما اتزنقنا تصرفنا صح، وبعنا لاعيبين في الشتاء وقدرنا نخطط لسيناريو ونجحنا فيه، ووصلنا للفوز بالدوري ونهائي الكونفدرالية، وإحنا مش بنبيع وخلاص، وإحنا النادي الوحيد اللي لعب في الدوري بـ7 ناشئين
و زاد لبيب:” إحنا استحملنا سنه صعبة اوي من الانتقادات والتشكيك والهجوم ..وانا سنه كاملة كنت تعبان فيها ومفتحتش بوقي وقدرنا نشتغل كلنا في صمت ونحقق حاجه ”
و أكمل: “احنا خلال سنه ونص كمجلس خدنا دوري سوبر أفريقي وكأس وكونفدرالية ووصلنا كمان النهائي السنه دي ومكنش في حظ في ركلات الترجيح، وانا لما كنت جاي فتره مؤقتة خدنا دوري كمان يعني بتتكلم احنا خدنا 2 دوري في ظروف صعبة”.
ومن جانبه تدخل الإعلامي عمرو أديب قائلا:” بس مكسبتوش الأهلي؟ ليرد لبيب:” كسبنا الأهلي قبل كده كذا مرة .. السنه دي بس اللي مكسبناش ويكفي أن آخر 6 سنين الزمالك واخد 3 دوري زي الأهلي ومش عايز اخش في اي مواضيع جانبيه خالص في القصص دي يا استاذ عمرو”.
