أكد أيمن يونس، نجم الزمالك السابق، أن تجربة جون إدوارد مع القلعة البيضاء كانت ناجحة تماماً بالنظر إلى الظروف الصعبة التي مر بها النادي، واستنكر الهجوم السلبي الذي تعرض له إدوارد بعد رحيله.
وقال يونس، خلال تصريحات تليفزيونية ببرنامج “من القاهرة”، عبر قناة “أون سبورت ماكس”، ردا على سؤال جون إدوارد نجح مع نادي الزمالك ولا لا؟”:” نجح، في ظل الظروف اللي اتعرض ليها، في ظل ظروف نادي الزمالك نجح. ليه بعد ما مشي بدأ يبقى في كلام سلبي كتير عليه؟ “.
و أضاف:” كل الناس كده، ما هو أنا وأنت لو مشينا من المكان ده هيتكلموا كلام سلبي علينا، عادي لكن هو عايز تقييمه؟ تقييم تجربته قاسية جداً، تحمَّل وهو مالوش ذنب، ما هي الناس مش عايزة تفهم، هو مالوش ذنب إن أنت اخترته، آه هو واحد من ضمن الناس قالوا له تيجي نادي الزمالك؟ حلم! جئنا نادي الزمالك بكل اللي عندكم دول، جئنا”.
و أكمل يونس:” قالوا له آه تعالى أنت طبعا خد كل الاختصاصات، فرحان وهنديك كل الاختصاصات، أنا هتدوني كل الاختصاصات؟ آه هنديهالك يا جون وهتورينا تعمل إيه، حاضر. الولد في ظل إن هو ما عرضش نفسه من الأول ولا جري على حد، واللي تم ترشيحه من خلال بعض نجوم نادي الزمالك، هو الولد عايز تظلمه في إيه؟ “.
وأشار:” هتقول لك أصل سلف نادي الزمالك وأصل والسلف ده عايز يعمله.. لا، إيه ده؟ اللف والدوران ده كلام بلدي قوي عيب. الولد دخل اشتغل، أنا بقى في الأول أقول لا جون إدوارد مايخشش يشتغل، بس مادام اشتغل وتم اختياره يبقى خلاص، أساعده وأدعمه، والكلام ده صعب على دماغ الناس معرفش ليه، حتى في الحلقة دي هيترجموا كلامي غلط، لكن إحنا كلامنا واضح”.
وشدد يونس: “هل جون إدوارد عرض نفسه؟ لا. هل جون إدوارد تم مساندته بشكل.. تم مساندته فعلاً بشكل فردي من بعض أعضاء مجلس الإدارة، ساهموا وساعدوا على شيء من الاستقرار، والأستاذ ممدوح عباس ساعده على شيء من الاستقرار لنادي الزمالك، شيء من الاستقرار يعني محاولة إنقاذ وده قدموه بشكل رائع”.
وواصل:” آه جون إدوارد استغل ده ووصلنا للكونفدرالية وكان يعني لو معاه بعض لعيبة بس كمان كان كان ممكن يكسب بمنتهى السهولة، وكسب الدوري في ظل إن الدوري الأهلي كان معاه فرقة يعني غير عادية مليانة نجوم زيادة عن اللزوم، وبيراميدز كان بمنتهى النضوج الكروي مع يورتشيتش وكاسب أبطال أفريقيا، فأنت في وسط ده كله خدت دوري؟ لا دي بطولة”.
وأتم يونس: “فتيجي تقول جون إدوارد بعد ده كله وحش كويس يا جماعة؟ وحش كويس إيه! هو أدى اللي عليه بشكل رائع ويفوق توقعات كتير من الناس رحيله.. كلمة رحيله قرار خاطئ، ما هو الراجل لما ينجح تمشيه؟ زي معتمد جمال” .
