فجّر الكابتن حسن شحاتة، المدير الفني التاريخي لمنتخب مصر، سلسلة من التصريحات النارية بشأن أزمة محمد صلاح وسفر المهندس هاني أبو ريدة، رئيس الاتحاد المصري لكرة القدم، لمصالحته، مؤكداً رفضه التام لفكرة ذهاب المسؤولين أو المدربين لمصالحة أي لاعب مهما كان اسمه.
وخلال حواره التلفزيوني مع الإعلامي مهيب عبد الهادي، استنكر “المعلم” تحرك رئيس اتحاد الكرة لمقابلة قائد المنتخب، قائلاً بنبرة حاسمة: “أولاً يا مهيب يعني هو ما يصحش إن رئيس اتحاد الكرة يسافر للاعيب عشان -أنا بقول- يستسمحه! مش يصالحه، يستسمحه إن هو يتغاضى عن اللي حصل”.
وأضاف شحاتة موضحاً أسباب الأزمة وموقفه من السفر: “واللي حصل ما حصلش من حسام حسن، اللي حصل ده مواضيع كتيرة دايرة بينه وبين حاجات عائلية يعني، حاجات العائلة إحنا ما بنتدخلش فيها مطلقاً. فعشان كده أنا مش راضي ومش موافق على سفر المهندس هاني أبو ريدة لتركيا عشان يصالح محمد صلاح”.
وشدد مدرب الفراعنة الأسبق على ضرورة الحفاظ على هيبة منصب رئيس الاتحاد، قائلاً: “محمد صلاح يتصالح ده لعيب لازم يتصالح من خلال الجزئية اللي هو فيها، المهندس هاني أبو ريدة راجل رئيس اتحاد الكورة ولحق هو كمان يتكلم الكلام ده ويقول لا وما يصحش، لكن مش يسافر عشان يتغاضى عن اللي هو عمله”.
وعندما سأله مهيب عبد الهادي حول موقفه لو كان مديراً فنياً وطُلب منه السفر لمصالحة اللاعب، كما تردد عن طلب أبو ريدة من حسام حسن السفر ورفض الأخير —وهو الأمر الذي أكد شحاتة عدم علمه به— جاء رد “المعلم” قاطعاً: “لا ما أوافقش أبداً أبداً، كنت لازم أرفض، حتى لو محمد صلاح، حتى لو الجن الأزرق، ما أروحش عشان أصالح لعيب”.
واختتم شحاتة حديثه بتفجير مفاجأة من العيار الثقيل؛ فبعد أن وجه له عبد الهادي سؤالاً مباشراً: “ممكن لعيب يشيل مدرب؟”، أجاب المعلم بتلقائية وصراحة: “ما هو حصل أهو!”، وعندما استفسر الإعلامي عما إذا كان يرى أن هذا الأمر قد وقع بالفعل، رد شحاتة ممازحاً ومثيراً للجدل: “ما هو أمال ده إيه؟ اللي حصل ده إيه؟ إنت تقدر تقول لي اللي حصل ده إيه؟ أنا ما أعرفش أقول، ما بعرفش.. وإنت أستاذ قول له”.
