انتقد أحمد بلال، عبر قناة الأهلي، ما اعتبره انشغالاً مفرطاً بتفاصيل حسين عموتة، قائلاً: «إحنا دلوقتي كل اتنين قاعدين عاملين قعدة عرب بيتكلموا على عموتة، ويقولوا إمتى هيمشي، وضحك ولا مضحكش، وبيبص للمساعد إزاي، وواقف مكشر ليه، هو هيفك التكشيرة ويضحك يوم كام؟».
وتوقف بلال عند الأسئلة المتعلقة باختيارات المدرب، متسائلاً: «هو ليه طلع هاني وساب إمام؟». كما انتقد توجيه الأسئلة إلى طعام عموتة وعلاقته بوائل جمعة: «هو الراجل بياكل ستيك ولا لحمة مفرومة؟» و«هو زعلان من وائل جمعة ولا اتصالحوا؟».
وفي رده على الانتقادات، استند إلى نتائج الفريق، قائلاً: «الراجل لعب 11 مباراة كسب 9 واتعادل 2، ولحد دلوقتي لم يُهزم». وأضاف: «أحمد زي الحاج أحمد، كله زي بعض بما فيهم بيراميدز، في ماتشات كتير بيكسب بأداء مهزوز وده عادي جداً، الفرق كلها كده».
كما قارن بين الإشادة بمعتمد جمال والهجوم على عموتة رغم خسارة الأول أمامه، داعياً جماهير الأهلي إلى مساندة الفريق وعدم المطالبة بتغيير المدرب بعد كل تعثر. وقال: «الأهلي له حق على جمهوره، إنه يشجعه ويصبر ويتحمل، وإن مش مع كل هزة يبقى فيه انتقادات ويتقال يلا نشيل المدرب». وأكد: «إحنا مش زي الفرق التانية، أول ما تتغلب ماتشين تجيب مدرب جديد عشان متنزلش درجة تانية، إحنا نادي بيلعب على بطولة، مبنحاسبش بالقطعة»، معرباً عن ثقته في مساندة الجمهور حتى آخر دقيقة.
