وجه صالح جمعة نجم النادى الأهلى الشكر الى مجلس إدارة النادى الأهلى برئاسة الكابتن محمود الخطيب، والفريق القانوني للنادى الأهلى على دعمهم فى الأزمة الأخيرة التى تعرض لها.
وقال “صالح” :” انا اتعود على كلام الناس ان كل شوية كلام يطلع صالح مش فى وعيه، وانا خلال اتعود، واللى حصل انى كنت نازل رايح التمرين وحصل حادث عادى جدا ممكن يحصل مع اى حد”
وأشار:” خبطت العربية اللى قدامى وصاحب العربية بدأ يطلب طلبات مادية غريبة وقولتله نروح اقرب قسم ونشوف الناس هتقول ايه، ولما روحنا لقينا القضية القديمة لسة مفتوحة وكنت خابط واحد فى الزمالك برضوا وكان طالب مبلغ 2 مليون ونزلنا الرقم لمليون ونص”
وأضاف “صالح” في تصريحات لبرنامج “ملعب أون” على قناة “أون تايم سبورت” : ” بعد فترة طويلة دفعت مبلغ كبير علشان اقفل القضية الاولى، وانا طلبت اعمل تحليل شامل سواء مخدرات او كحول علشان انا عارف الناس هتتكلم في ايه والحمد لله النتيجة طلعت سلبية”
وتابع: ” مكنتش سهران فى نايت كلب زى ما الناس قالت، وده طريقى المعتاد كل يوم، واللى كانت معايا فى العربية هى زوجتى مش طليقتي زى ما البعض قال، وهي لم تشتكينى فى النيابة زى ما الناس قالت، وانا خبط عربية واحدة اللى كانت راكنة على اليمين ودفعت تعويض للعربية اللى خبطها”
وواصل:” دفعت 200 ألف جنية للشخص بتاع القضية الأولى ودفعت للقضية الثانية، وانا كنت سايق عربية عبداله لاننا عايشين مع بعض وساعات بنزل بعربيتى او عربيته عادي، وحابب اشكر المستشار مرتضى منصور اللى بعت محامي خاص به، وامير مرتضى مسابش عبدالله لانه طلب محامي ليا”
شاهد:
وأكمل:” بحاول اتمرن مع الفريق علشان اتخلص من مشكلة الوزن الزائد، وفايلر بيتكلم فى حاجة حقه لانه حابب يكون كل اللاعيبة جاهزة ودى حاجة متزعلنيش بالعكس لان دى حاجة ترجع عليا بالنفع”
وأتم: ” وقعت للنادى الأهلى على بياض قبل سفرى السعودية للإعارة، وفاضلى سنتين في عقدي وانا متمسك بالفرصة فى الاستمرار فى الأهلي، وفيه ناس اتكلمت معايا برة وجوة انى اخرج بطريقة غير شرعية”
وعن حقيقة مفاوضات نادى الزمالك معه أوضح ” عبدالله بتكلم معايا على طول، وبياخد راى وهو دايما بيقولي عايزك تيجى الزمالك وانا برد عليه اقوله، وانا عاوز تيجى الاهلى وتشوف الناس، وانا احترامًا للنادى الأهلى مينفعش اتفاوض او اقعد مع مسئولى الزمالك، لأن الأهلى متاخرش عليا في حاجة ومأخروش عليا جنيه واحد، وكل كلام محمد صبحى انى وقعت للزمالك ده كلام غير صحيح بالمرة وانا بستغرب من الكلام ده لانى موقعتش للزمالك او نادى تانى، وان شاء الله الفترة الجاية هكون مركز أوى”
