حرص جمال عبد الحميد نجم نادي الزمالك و عضو مجلس الإدارة الحالي على توجيه رسالة هامة إلى لاعبي الفريق الأول لكرة القدم.
و وجه جمال عبد الحميد خلال إستضافته في برنامج زملكاوي على قناة الزمالك رسالة إلى محمد أبو جبل قائلاً : أبو جبل من أحسن حراس المرمى في مصر ، و هنفضل نحبك يا أبو جبل عشان أنت مخلص ، و سيب كل حاجة ورا ضهرك و ركز في الملعب فقط.
حازم إمام :-
عايز أشوفك من أول المباراة يا حازم ، حاول تتعالج صح و تتأهل صح ، لأن أنت لاعب كويس جداً ، و بتنزل تفرق في شكل الفريق في الملعب.
حمزة المثلوثي :-
انت لاعيب كويس ، و أتمنى تلعب بالطريقة بتاعتك و أسلوبك اللي كان السبب في التعاقد معاك ، فأتمنى تظهر بشكل كويس.
محمود الونش :-
من أفضل اللاعيبة اللي عندها قفزة عالية ، و اتمنى يستغل ده في إحراز الأهداف للفريق من الضربات الركنية أو الركلات الحرة.
محمود علاء :-
أنت لاعب جيد ، و وصلت لمرحلة كنت هداف الفريق ، و بقولك “سد ودنك” و ركز في الملعب.
محمد عبد الغني :-
حاول تدوس على نفسك و تتمرن كتير عشان تقدر تنضم لـ منتخب مصر إن شاء الله.
أحمد فتوح :-
ده أبننا ، و عايزوه في الحانب الهجومي يبقى أقوى من كده ، و لما يهاجم يطلع مهاراته اللي بيعملها في الخماسي.
محمد عبد الشافي :-
ده مالوش كلام ده حبيبي ،، و ربنا يوفقه في كل حياته
طارق حامد :-
قلب الأسد ، عنده قلب زيادة عن قلبه ماشاء الله ، و ربنا يوفقه ، و الماتشات اللي مابيلعبهاش بنتأثر فيها.
إمام عاشور :-
من أفضل لاعبي الزمالك الموسم الحالي ، و نصحته إن يعمل تاريخ لنفسه و لنادي الزمالك.
محمد أشرف “روقا” :-
من أفضل الديفيندرات في مصر ، بس مكتف نفسه مش عارف ليه ، مش عارف خايف من ايه ، ألعب بطريقتك العادية.
أيمن حفني :-
إن شاء الله يا أيمن ترجع بالسلامة زي أيامك اللي قبل كده ، و من أمهر اللاعبين اللي في تاريخ مصر.
أحمد سيد “زيزو” :-
فاكهه الزمالك الحالية ، و أفضل لاعب في الوقت الحالي ، بس مش عايزوه يتكلم مع الحكام كتير ، و مالكش دعوة بأي حد.
أوباما :-
عايزين أهدافك الجميلة اللي كنت بتكسبنا بيها ، و إن شاء الله لما تسجل هاتفتح معاك.
أشرف بن شرقي :-
جمهور الزمالك بيحبك ، بس ماتعملش زي فرجاني ساسي
سيف الجزيري :-
خليك جوه الـ 18 و بلاش الأطراف ، أنت لاعيب هايل و ان شاء الله تكسبنا الفترة الجاية
عمر السعيد :-
من اللاعيبين الجيدين باللعب بالرأس ، و لازم الأطراف ترفعله ، و يبقى هو جوه 18 بصورة مستمرة عشان تقدر تسجل.
شيكابالا :-
ياريت يا شيكابالا تخف بسرعة عشان إحنا محتاجينك ، لما بيلعب بحس إن الماتش بتاعنا.
