هناء حمزة توجه رسالة نارية وشديدة اللهجة للإعلامي أحمد شوبير و تعلق :”من حقي اسألك هذا السؤال”
حرصت هناء حمزة نجمة النادي الأهلي السابقة و منتخب مصر للكرة الطائرة على توجيه رسالة شديدة اللهجة للإعلامي أحمد شوبير.
و كتبت هناء حمزة عبر حسابها الرسمي على فيس بوك: إلى الكابتن شوبير ،،حضرتك وجهت لي سؤال من خلال برنامجك فى الاذاعه اذا كنت اشغل منصب فى نادى الزمالك وانا هجاوب على السؤال بس فى الاول عايزه أعرف من حضرتك الغرض من السؤال هل للشوشره و التشويه اذا كان كده فده الوضع العادى اللى بتقوم بيه لجانكم الالكترونيه مافيش مشكله ولكن اذا كان سؤالك لمجرد المعرفه وانا اشك فى ذلك لانه كان ممكن ترفع سماعة التليفون وتسألنى شخصيا وانا هجاوب
ما علينا حضرتك ممكن تسمع الرد
انا اسمى هناء حمزه نائب رئيس الاتحاد المصرى للكره الطائره و رمز من رموز الكرة الطائرة المصرية و الافريقية و تشهد علي ذلك بطولاتي في منتخب مصر و النادي الاهلي شاء من شاء و ابي من ابي… و لم اشغل اي منصب لا في الزمالك ولا فى الاهلى ولا فى اى نادى اخر وعلاقتى بكل الانديه على مسافه واحده ولا امتلك غير ستر ربنا ولم اقبل فى يوم من الايام من اى بشر ايا كان هدايا او عمولات او اي شىئ الحمد لله لان كرامتى اغلى من اى شىء ولو كنت بقبل كان يبقى حالى غير كده خالص كان زمانى راكبه احدث عربيه وامتلك افخم ڤلل في القاهرة و الساحل وحساباتى فى البنوك مالهاش عدد وبشغل بنتى خريجة اعلام الجامعة الامريكية فى احسن مكان حتى لو ماعندهاش فكره وغيره وغيره وغيره لكن اقسم بالله لا امتلك غير ستر ربنا
اخيرا انا لما احب اشتغل هشتغل فى الاعلام يا ابو الكباتن لان ده هو شغلى الحقيقى وساعتها سوف يعلم الجميع بدون شك
اما محاولة تشويه صورتى امام اسرة الرياضه المصريه لن تنجح فالكل يعلم اننى لا اخاف الا من رب العباد
و اعتقد من حقي اسألك نفس السؤال هل حضرتك تشغل منصب داخل النادي الاهلي ؟؟
