كشف حسين البشبيشي عضو مجلس إدارة الاتحاد المصري لكره السله و رئيس لجنه شئون اللاعبين عن كواليس قرار اتحاد السله بأحقيه الاتحاد السكندري في أنس أسامه.
وكان الزمالك قد أعلن عن تجديد تعاقده مع أنس أسامه ، قبل أن يعلن الاتحاد تعاقده مع اللاعب لتنشب أزمه بين الناديين بسبب اللاعب .
وقال البشبيشي :”انس اسامه اصبح لاعباً رسمياً في صفوف الاتحاد السكندري بعد الاطلاع على عقدين الزمالك والاتحاد السكندري “.
وواصل :”من الشروط الخاصه بصحه العقد ان اللاعب يكون ماضي على اللائحه الداخليه للنادي الي بتبقى خاصه بالمكافئات والعقوبات وده شرط من الموسم الماضي “.
وأضاف :”نادي الاتحاد جاب عقود انس اسامه ومعاها لايحه النادي موقع عليها ، في حين الزمالك جاب العقود بس ومجبش اللايحه اللي المفروض اللاعب يوقع عليها”.
وأكمل :”لما راجعنا عقود الزمالك ارسلنا ليهم ٣ مراسلات اول واحده يوم ١٣-٨ ، يوم ١٤-٨ بعتنا ليهم قولنا العقود فيها كشط و العقود مش مترجمه للانجليزي كامله الترجمه ناقصه “.
وأردف :”الكشط ده ممكن يكون عباره عن شطب توقيع ، او عمليه تعديل مثلا يبقى الخط متتقل عليه ٣ او ٤ مرات مثلا “.
وشدد :”الزمالك العقود كان فيها تعديل على توقيع و تعديل على بعض الكلمات في العقود ، يوم ٢٤ -٨ بعتنا يا جماعه تمت المراجعه ولابد لازم يجي مندوب من النادي يستلم ال٣ نسخ ويعدلهم ويجيب معاهم اللايحه ، الزمالك كان عنده من يوم ٢٤-٨ لحد يوم ١٥-٩ يعدل العقود و يبعتها مظبوطه”.
وأتم :”لو كان حصل كده كان هيبقى عندنا نزاع بين الناديين ، محدش جه من نادي الزمالك وبالتالي ورق الزمالك كان غير مستوفى وبالتالي اللاعب ده يصبح من حق الاتحاد السكندري”.
