فتح المستشار مرتضى منصور رئيس مجلس إداره نادي الزمالك النار على رئيس النادي السابق ممدوح عباس بسبب حجزه على أرصده النادي في البنوك .
وقال مرتضى :”ممدوح عباس ملوش ولا جنيه في النادي وبأكد تاني ملوش اي جنيه في النادي ، يوم الأربع هكشف عن كل حاجه في المؤتمر الصحفي “.
وواصل :”هو طلع مع أحمد شوبير في ٢٠٠٦ وقال انا بتبرع للنادي ب٤٠ مليون جنيه وبعد فتره قال ال٤٠ مليون جنيه دول قرض “.
وأكمل :”هو قال ان الفلوس دي قرض ، وعشان تبقى قرض لازم يبقى فيه قرار مجلس اداره ، والقرار ده يتعمل بيه محضر لمديريه الشباب والرياضه ويتوافق عليه والكلام ده محصلش “.
وأردف :”الكلام ده برضو محصلش في فلوس تركي ال الشيخ للنادي الأهلي ، لكن انا عملت كده في الفلوس بتاعه تركي ال الشيخ للزمالك”.
وأضاف :”انا مكتم على كل اللي بيحصل ده عشان في صفقات مع الانديه واللاعيبه وخايف ان الصفقات تفشل “.
وواصل :”بيقولك انا حجزت على بنك واحد ، وحياه مامتك ده البنك الوحيد اللي فيه الفلوس اصلا ، وهو اللي فيه فلوس النادي كلها الي هي فلوس عامه”.
وإستطرد :”الناس بتقول الزمالك اتعادل وخسر بضربات جزاء ، ده كويس ان الزمالك اتعادل واللعيبه عارفه ان محجوز على فلوسها ، احنا حاطين جزمه فبوقنا وساكتين ، ما تلم نفسك يا اخي بقا “.
وشدد :”ده كلم كل الناس وقالوله اتهد وكلم عمرو الجنايني وقاله اتهد ، انا عاوز اعرف مين حامي البني ادم في البلد يطلع يقول انا حاميه ، هو نادي الزمالك ده عزبه امي ، بتضرب الزمالك في اخطر اسبوع عشان الصفقات ،احنا سكتنا لحد ما نخلص صفقاتنا عشان الانديه و اللعيبه متخفش والصفقات تفشل “.
وأتم :”انا بقولك يا ممدوح يا عباس اني اتصرفت وكل لاعب اتفقت معاه على فلوس هياخدها ، عشان احرق دمك يا ممدوح يا عباس انت و المحامي الاخواني بتاعك اللي فرحان انه عامل جريمه”.
