“حاجه تكسف ” .. أحمد نادر السيد يتحدث لأول مره عن عدم مشاركته في أمم إفريقيا.. وكواليس “فضيحه” المنتخب!!
كشف أحمد نادر السيد كواليس الخروج الكارثي لمنتخب مصر من بطوله أمم إفريقيا للشباب الأخيره والمقامه حالياً في مصر،كما كشف كواليس عدم مشاركته في البطوله.
وكان المنتخب المصري قد ودع البطوله من دور المجموعات ، وذلك بعدما فشل في تحقيق اي فوز او تسجيل أي هدف طوال فتره مشاركته في البطوله .
وقال أحمد نادر السيد في تصريحات تلفزيونية عبر برنامج ملعب أون تايم:”كنت زعلان جدا اني مقدرتش اساعد المنتخب بأي طريقه ، حاولت اخبي كده عشان المركب تمشي واللعيبه تأدي بشكل احسن “.
وواصل :”الجيل ده كويس وهيجي منه واتمنى الناس تقف وراهم وتدعمهم” .
وتابع :”استبعادي كان صدمه كبيره ليا ، اللي حصل ان لحد قبل اول ماتش محدش كان عارف دوره ايه وده سبب تشتيت للفريق” .
وأضاف :”لحد قبل الماتش بيوم كان بيتقالي كلام حلو وركز و بعدين يوم الماتش الصبح عرفت اني مش هلعب وده كان صدمه ليا لاني مستني البطوله من سنتين وكنت بلعب كل الماتشات الرسميه”.
وشدد :”كان عندي وجع صغير في ضهري وكنت هلعب عادي بعدين قالولي لا هنريحك عشان ضهرك وطبعاً لما عرفت رد فعلي مكنش احسن حاجه” .
وأردف :”زعلت شويه ومعملتش شوشره كبيره وبرضو اتأسفت للعيبه لان خوفت يحسوا اني منفسن منهم ولكن عمري ما كنت كده وهما عارفين”.
واستطرد :”احنا كلاعبين عارفين من زمان ان الكلام مع كابتن محمود صعب ، هو شخصيه aggressive شويه ، ومبيحبش يتكلم مع لاعبين ،طبعا الكلام موصلش لحاجه” .
وتابع :”كان نفسي اعرف انا ملعبتش ليه بس ، اتدربت كويس وكملت البطوله حتى لو عارف اني مش هلعب ، وان شاء الله اللي جي مع المنتخب الاولمبي والأول بقا “.
وأكمل :”في حاجه مينفعش تتقال قدام الناس ، كان في مشاكل صغيره وبعدين المشاكل اتجمعت فبقت مشكله كبيره” .
وواصل :”الخساره من السنغال ٤ صفر حاجه تكسف ولقطه سوده في التاريخ ، انا مش شايف ان اللعيبه هي السبب اننا نخرج من البطوله”.
وأتم :”بعد المباراه التانيه حصل مشاكل بين محمود جابر وبين اللاعبين ، وده أثر على مباراه السنغال ، استاذ جمال علام اتكلم معانا وكانت في غياب الجهاز الفني ، بعد ماتش نيجيريا كنا تحت الارض وخرجنا نفسيا من البطوله”.
