أكد طارق السيد نجم نادي الزمالك السابق أن البرتغالي جيسوالدو فيريرا المدير الفني لفريق الكره الأول بنادي الزمالك هو من ضمن الأسباب الرئيسيه وراء أداء الزمالك المتذبذب خلال الفتره الماضيه ، مشيراً أن الزمالك والأهلي لا يجيدون التعاقد مع المحترفين.
وقال طارق السيد في تصريحات تلفزيونية عبر برنامج جمهور التالته:”الفارق بين مباراه الترجي السابقه ومباراه اليوم هو الروح القتالية فقط لا غير “.
وتابع :”النهارده لا روح ولا قلب ولا عزيمه وكل لاعب بيعمل اللي هو عاوزه وحاجه مش طبيعيه ، مش طبيعي الزمالك يمشي على سطر ويسيب سطر” .
وواصل :”في ناس مش عاوزه انتقاد لا عاوزه نطبل بس وبيتقال اصل ولاد الزمالك بيقطعوا في النادي” .
وأكمل :”الموضوع مبقاش خاص بالاهلي والزمالك بس لا ده كمان بقا المنتخبات كده ، ما لما الاهلي والزمالك يبقوا كده يبقى طبيعي المنتخب كده” .
وأضاف :”نيجي بقا لمسأله المحترفين هل الاهلي والزمالك اللي بيجيبوا لاعبين ب٢ مليون ومليون ونص عندهم نص كواليتي لاعيبه صن داونز اللي ب٢٠٠ الف دولار ؟” .
وشدد :”فيريرا لعب مباراه اليوم بنفس اسلوب الترجي ولكن جه في الشوط التاني عمل شقلبه في الملعب كله ودماغه بقت ملغبطه ودي عامله مشاكل كتير جدا للاعبين ، انت بتشقلب اللاعيبه ليه تاني ما كنت ماشي كويس” .
وأتم :”انا وصلت لمرحله في الماتش مبقتش فاهم هو الزمالك بيلعب ازاي ، يعني انا بتفرج علشان اتعلم من الراجل حاجه تنفعني حتى فشغلي معرفتش افهم حاجه.”
