أكد محمود عبد الرازق “شيكابالا”، قائد نادي الزمالك السابق، أن الفريق الأبيض يمتلك فرصة قوية للمنافسة على لقب الدوري المصري هذا الموسم رغم كافة الظروف الصعبة.
و قال شيكابالا، خلال تصريحات تليفزيونيه ببرنامج” الكورة مع فايق”،عبر قناة” mbc مصر 2″: “في الظروف الصعبة دي الزمالك بيقدر ياخد الدوري، والله قريب. الزمالك معانا مدرب عايش الحالة، أنا عايزك تشوف الجون الأول التعادل بتاعنا”..
وسأله إبراهيم فايق:” مين اللي قال لعبد الله خلص عدي بس؟ ليجيب: معتمد.. كابتن معتمد. معتمد قال له يلعب بسرعة، تفاصيل واحد عايش مركز في شغله، واقف جنب عبد الله بيشاور له بيقول له باصي له، جه منها الجول، فده واحد عايش الحالة بس”.
وشدد شيكابالا: إحنا من أول مرة بيخش فينا جول بنرجع بعد ما بنتأخر، ده ما كانش بيحصل مع يانيك فيريرا، وده اللي قلناه إنه لازم يمشي من بدري، شخصية الزمالك اتغيرت آه، عشان هو بيشتغل صح وبيوظف اللعيبه صح وبيقرأ الملعب صح وبيتدخل بتغييراته صح وبيعمل كل حاجة صح”.
وعاد إبراهيم فايق وقال:” طيب على ذكر ده، وبما إن إحنا فتحنا السيرة في الزمالك، فالزمالك هو الفريق المصري الوحيد اللي موجود في الكونفدرالية. بتشوف إزاي يا شيكا، كابتن بركات، قدرة الزمالك على إنه يقدر.. خد بالك من بين كل المتنافسين في الدوري هو الوحيد اللي عنده حتتين بيشتغل عليهم: دوري وأفريقيا. قدرته على إنه يركز في الاتنين تشوفها إزاي؟
ليرد شيكابالا: لا ما أنا بقول لك كابتن بركات دي مش سهلة، كابتن معتمد حاطط عين هنا وعين هنا، وشخصية الفرقة اتغيرت، شخصية يا إبراهيم، يعني أنت بتتفرج في ماتش المصري دخل فينا جون بس أنا متأكد إن الزمالك هيرجع، ده الفرق. فزي ما هم مسافرين إن شاء الله في الجزائر، إن شاء الله نرجع بنتيجة إيجابية، وفي أسبوع تاني نقعد نركز”.
وواصل: “إحنا الدوري ما بنقولش إننا هناخد الدوري بس إحنا بنقول إننا هناخد الماتش بماتشه، مالناش دعوة بحد، نبص في ورقتنا ماتش بماتشه لحد ما ربنا يشوف إحنا كاتب لنا إيه في آخر الدوري إن شاء الله”.
و أشار شيكابالا:” إحنا خدنا الدوري كان فاضل 9 ماتشات، فأنت شايف حاجة؟ أيوه مش شايف 30 ماتش، أنا شايف 9 ماتشات فأقدر أعمل عليهم معسكر. ومعانا جمهور بيملى الاستاد، يلا ندوس”.
وعاد إبراهيم فايق وسأل شيكابالا: “من ناحية تانية تيجي تتكلم على الزمالك قدام المصري، أداء كبير جداً جداً، الأول كان في أخطاء أول ربع ساعة، الزمالك دخل فيه هدف وبيعرف يرجع. ناصر المنسي ده إيه؟ أنا جبت الإحصائيات ده أحسن من ميسي ومن نيمار، ده إحنا جمهورنا بيغني له كدة دلوقتي.
ليؤكد شيكابالا: هو يستاهل، الجون يا إبراهيم أنا ما بحبش نغمة اللي هو عشان طيب وعشان غلبان، لا كابتن إسماعيل سماه ناصر فان باستن، لعيب كبير قوي. ربنا كرمه في الجون اللي هو جابه اللي هو ضغط قبله فربنا بيكافئه على الضغط اللي أنت عملته بالجون الحلو اللي أنت جبته ده”.
واختتم:” اتفرج على فتوح، فتوح هو اللي ركبنا الماتش. أنا نفسي بس يا كابتن معتمد اللي هو بيلاعب خوان ناحية الشمال ساعات ويعديه ناحية اليمين، أنت كدة بتخسر نص قوة خوان، لأن هو اللي بيحل هو اللي عنده اللاعيب اللي بياخد الريسك، ده لازم ألعبه على عدلته وأخلي عدي الناحية التانية عشان ما تخسرش خوان.
