تحدث الإعلامي مدحت شلبي، عن خطايا محمود الخطيب، رئيس النادي الأهلي خلال الفترة الماضية، منتقدا سياساته في التعاقد مع اللاعبين والمديرين الفنيين، ووجه سؤال ناري.
وقال شلبي، خلال تصريحات تليفزيونية ببرنامج يا مساء الأنوار، عبر قناة “mbc مصر 2″:” اكيد اليومين اللي فاتوا كل الزملاء في كل الاستوديوهات تحدثوا عما حدث في لقاء الأهلي تحديداً يعني لقاء إنبي والزمالك كون إن هو ينتهي بالتعادل هذا أمر وارد ولكن ما هو غير وارد وغير متوقع أن يهزم الأهلي بثلاثة أهداف نظيفة من بيراميدز وفي الدور الأول يهزم من بيراميدز بهدفين نظيفين. إذاً في موسم واحد تلقى الأهلي من بيراميدز خمسة أهداف دون أن يسجل أي هدف في هذا الفريق”.
و أضاف:” الكل تحدث عن الأسباب والحكايات والروايات خليني بس وهنا والله العظيم أقسم بالله أنا أتحدث بموضوعية بعيداً عن أي اعتبارات إطلاقاً إطلاقاً وبصرف النظر عن نتيجة مباراة الجمعة سواء سواء الأهلي كسب أو الزمالك كسب أو تعادلها مش عايزين إطلاقاً إن نتيجة مباراة تنسينا ونتغافل عن مجموعة أخطاء كبيرة الكل تحدث عنها ولكن النهارده ربما أضيف بعض النقاط اللي وصلت الأهلي مش بس إنه يتغلب 3-0 لا إنه كمان بيراميدز تنقل بالعشر نقلات والـ 15 نقلة على لعيبة النادي الأهلي في منظر لم نعتاده إطلاقاً إطلاقاً ونحن نشاهد هذا المارد الأحمر لدرجة إنه الكاميرات تجولت في المدرجات ووجدنا دموع غالية من مشجعي النادي الأهلي تنهمر فوق الجبين”.
وتابع شلبي:” إيه اللي وصل الأمر إلى هذا ده التحليل اللي أنا عايز أقوله كده بهدوء جداً وببساطة جداً وبموضوعية وبدون غرض. النادي الأهلي وهنا لما بتحدث عن النادي الأهلي أتحدث عن من يدير النادي الأهلي مفترض إن هو مجلس الإدارة طبعاً ورئيسه قطاعاً ورئيسه تولى زمام الأمور لفترة ليست بالقصيره كمسؤول أول عن كرة القدم إلى أن سلم الراية وفقاً لما أعلن الأستاذ ياسين منصور والكابتن سيد عبد الحفيظ”.
و أشار: “أتصور بداية الأخطاء الإدارية الجسيمة وجهة نظري بدأت بانسحاب النادي الأهلي الموسم قبل الماضي من كأس مصر مش هروح للأسباب السنة اللي قبل اللي فاتت النادي الأهلي انسحب من كأس مصر نادي الأهلي وبالتالي عوقب الموسم الماضي بعدم المشاركة في كأس مصر ثم هذا الموسم خرج من دور الـ 32 من كأس مصر على يد المصرية للاتصالات الذي يتبارى في القسم الثاني إذاً ثلاث مواسم متصلة بقرارات إدارية النادي الأهلي خارج إطار كأس مصر هذا ليس النادي الأهلي على الإطلاق”.
وواصل شلبي:” ثم نذهب الموسم الماضي لواقعة ألمتنا جميعاً وألمت ملايين الأهلاوية رضينا أم أبينا هذا ما حدث وفي ليلة رمضانية جميلة اصطفت الملايين ليس في مصر ولكن في الوطن العربي بأكمله لتشاهد لقاء القمة بين الأهلي والزمالك بل وحتى لاعب النادي الأهلي استعدوا وأرادوا وتمنوا أن يتباروا في هذه المباراة أمام منافسهم الغريم التقليدي نادي الزمالك وذهب الآلاف إلى استاد القاهرة يعانون من مشكلة الصيام والإفطار على منصات أسمنتية في استاد القاهرة انتظاراً لقدوم عملاقهم الأحمر الكبير ليتبارى أمام نادي الزمالك”.
وزاد: “الكل بالمناسبة في هذا التوقيت كان لديه قناعة وفقاً للأسكواد الكبير اللي كان في النادي الأهلي إنه سيحظى بالثلاث نقاط أمام غريمه نادي الزمالك هذا كان التوقع حتى إحنا كإعلاميين يعني صرف النظر إنها مباراة تحتمل كل شيء لكن الأسكواد كان عالي أوي بتاع النادي وإذا فجأة بفرمان يأتي بالانسحاب من هذه المباراة. الملايين اللي اصطفوا أمام التلفزيون أصيبوا بإحباط شديد وعنيف لأنه قرار مفاجئ وقرار فردي وقرار لا يحمل في طياته إطلاقاً احترام الملايين اللي انتظرت هذا القرار أياً كانت أسبابه ناهيك عن الآلاف اللي راحت استاد القاهرة قبل الفطار بثلاث أربع ساعات وفطرت في استاد القاهرة على أضواء الاستاد وانتظرت وتمنت حتى جاءت التاسعة كانوا يعني يتوقعون ويتمنون ويأملون أن يصل النادي الأهلي ولاعبة النادي الأهلي وهذا لم يحدث”.
و أردف شلبي:” وهذا كان من وجهة نظري خطأ جسيماً أياً كان السبب، وبالمناسبة السبب يعني إن رابطة الأندية فيما سمي قرعة الفجر حطت الأهلي مع الزمالك بعد خمس أيام من القرعة أعتقد القرعة كانت الخميس على ما أتذكر والمباراة كانت الثلاث وبالمناسبة السبت والحد الاتحادات الأوروبية كلها قافلة “باي ذا واي” يعني ولم يصل لاتحاد الكرة أي مكتوب حقيقي لطلب طلب حكام أجانب إلا على الواتساب بتاع هاني أبو ريدة قبل المباراة بـ 48 ساعة “باي ذا واي” والرابطة أخبرت النادي الأهلي إنها أخبرت اتحاد الكورة”.
و أستطرد:” طب إزاي هو متخصمش منه ست نقاط أسوة بالزمالك؟ لأنه في بند في الرابطة بيقول إن اتحاد الرابطة لها إقرارات فيما لم يجد به نص والحكاية والرواية واستندوا لهذا الأمر ولم يقدم بيراميدز الأوراق التي تثبت الحكاية والرواية فكانت النتيجة في النهاية إن المحكمة الرياضية حكمت للأهلي أو حكمت بالموافقة على خصم ثلاثة نقاط بالرغم إنه الطبيعي جداً إن كانت تخصم ست نقاط لسبب بسيط جداً إنه المباراة اتحددت بعد خمس أيام بالضبط يعني طلع القرعة الخميس يوم الثلاث كانت المباراة واللائحة في هذا التوقيت بتقول إن حضرتك من حقك تطلب حكام أجانب ولكن قبل أسبوعين من المباراة لكن المباراة خمس أيام فقط لا غير”.
و أكمل شلبي:” طب مشكلة اتحاد الكرة اللي كان لو عملها كان طارت الست نقاط من النادي الأهلي وهنا ساعتها النادي الأهلي ما كانش هياخد ولا نقطة وكان الست نقاط هيتخسموا إن اتحاد الكورة كان يجب إن هو يبعت على طول يقول ما عندناش فرصة إن إحنا نجيب حكام أجانب كانت ست نقاط طاروا من النادي الأهلي ولم يكن يأخذ الدوري اللي هي البطولة اللي أخدها السنة اللي فاتت لكن شاء المولى أن يكون رحيماً بجمهور النادي الأهلي إن تحدث أخطاء في الأوراق فتكون النتيجة إنه يتخصم منه ثلاث نقاط بدلاً من ست نقاط أسوة بالزمالك”.
واسترسل:” الامر الثالث الصفقات الكثيرة جداً التي أبرمت هذا الموسم وجزء كبير من هذه الصفقات لم يتم الاستفادة به على الإطلاق جزء وفقاً للكلام مسؤولية الكابتن محمود الخطيب اللي هي الانتقالات الصيفية والجزء الثاني الشتوية وفقاً لقرار الكابتن محمود الخطيب يتحملها ياسين منصور وسيد عبد الحفيظ مع طبعاً الاحترام بالألقاب يعني”.
وأسهب شلبي:” طيب لو بصينا في الورقة اللي قدامي دي في 14 صفقة 14،بالمناسبة اللاعيبة دي ثلاث أرباعها ما بيلعبش واللي بيلعب بيلعب أوقات بسيطة وأجزاء من المباريات، لو رحنا للمديرين الفنيين وما حدش يزعل مني يا جماعة أنا برصد حقائق ليه؟ علشان هنهي كلامي وأقول الفلوس دي اللي اترمت دي من جيوب هل من جيوب أشخاص ولا هي من ميزانية النادي الأهلي الكبير وأعضاء جمعيته العمومية؟ هذا هو السؤال”.
وأردف:” إذا كانت من جيوب أشخاص رجال أعمال خلاص ولا حد وأنا أول واحد مافتحش بقي خالص مش مشكلتي الناس بتدفع هي حرة أما إذا كانت من أموال النادي هذا أمر آخر. نروح للمديرين الفنيين أخ كولر التعاقد معاه سنة 23 عقده كان لغاية 26 رحل في أبريل 25 كلكم عارفين القصة كان يستحق الحصول على 15 شهر راتب الكلام إنه حصل على تسع شهور وهو قاعد في بيته بيشرب الشاي والـ “إنجلش كيك” هذا هو مين؟ كولر تسع شهور قاعد في بيته رجل على رجل بيشرب الشاي وبياكل إنجلش كيك ليه؟ ليه؟ ببساطة شديدة جداً لأن اللي أبرم العقد عقد إذعان عقد مش موجود في تاريخ أي نادي بنتكلم على أندية بحجم أهلي وزمالك وأندية عربية ما بتكلمش على أجانب خالص وبعدين لما طلعنا قلنا الكلام ده كله ناس قال لك أصلة غلطة في الترجمة ناس قال لك أصله الشؤون القانونية ناس قال لك أصل لجنة التخطيط ناس في النهاية في مجلس إدارة طب ماشي يا سيدي”.
و أكد: “عدينا كولر جه ريبيرو نفس القصة ونفس عقد الإذعان ونفس الشروط الغريبة والعجيبة ريبيرو لما جه جه في 29 مايو مشي يا دوبك قعد مايو يونيو مشي في أغسطس 31 كان عقده موسمين لكن رحل مقابل شرط جزائي ثلاث شهور بقيمة 480 ألف دولار وفقاً للكلام وهو هيرفع أمام المحكمة الرياضية وفقاً لمعلوماتنا عشان يطالب بعقده بالكامل ديزكيبه فلوس”.
و استأنف:”توروب عقده من 8 أكتوبر مفروض سنتين غير النص سنة اللي قعدها وأنا قلت قبل كده جايبين يس توروب من نادي ألماني الراجل ده اسمه فراسبورج أو فوكسبورج أياً كان اسمه هو فلفسبورج ماشي هذا النادي اللي كان بيدربه اللي إنتوا جبتوه على سمعته درب النادي الألماني سنتين سنة مركز 11 وسنة مركز 12 اتغلب في 25 مباراة من 60 مباراة هل ده سي في يليق وهل ده سي في يستحق إن إنت تحط له عقد بهذا الشكل؟ إنت هتمشيه خلي بالك عقده رضيت أم أبيت مستمر لغاية نهاية الموسم هتتدفعله هتتدفعله عشان كده كان في قرار حكيم من ياسين منصور إن هنمشيه إزاي وندفعله سكيبه فلوس خليه وخلاص هذا هو الأمر”.
واستطرد شلبي:”. طيب لو رحنا لمديرين الكورة هتلاقي النادي الأهلي مغير مجموعة مديرين كورة في وقت ما بتحصلش دي يعني سيبك من سامي قمصان اللي قعد حاجة بسيطة محمد رمضان من أكتوبر 24 لأبريل 25 محمد شوقي قام بأعمال حتى مايو 25 محمد يوسف من يونيو 25 لأكتوبر 25 وليد صلاح الدين من أكتوبر لغاية دلوقتي هل معقولة أربع خمس مديرين فنيين في موسم أو موسم وزيادة حتة مش ممكن”.
واستكمل: “نيجي للطامة الكبرى من وجهة نظري من وجهة نظري الفوارق الرهيبة ما بين عقد زيزو وعقد بعض اللاعبين اللي هم شايفين إن هم يستحقوا والحقيقة هم يستحقوا وعلى رأسهم إمام عاشور. هل أنا هسأل سؤال ساذج جداً هل إمام عاشور قبل زيزو هو إمام عاشور بعد زيزو؟ هل إمام عاشور الأساسي اللي مكسر الدنيا ومرشح إنه يبقى أفضل لاعب في أفريقيا يبقى احتياطي ويلعب ربع ساعة؟ آه عشان مستواه نزل طب مستواه نزل ليه؟ لأن دماغه لعبت طب دماغه لعبت ليه؟ لأن شايف واحد بياخد رقم خيالي وهو زيه أو أنا في رأيي هو أحسن منه طبعاً في حالته ده وفي حالته ده لا إمام أحسن، بياخد أقل دماغه الولد اتحولت فبدأ يعمل حاجات غريبة جداً لأول مرة رايحين أفريقيا قعد في بيته وقافل موبايل سيبك من السيناريو اللي اتعمل كان عينه ومش عينه بعد يومين كان بينزل والحكاية والرواية من تنزانيا”.
وواصل:” عايز أسأل سؤال بسيط جداً هو إحنا لما جينا نعمل العقد بتاع زيزو ده ما كانش في ذهننا وإحنا بنعمل عقد زيزو ده إن عندي لعيبة ممكن تتاثر؟ لأنه ما فيش حاجة تستخبى بالقيمة المالية العالية جداً لهذا العقد وبالتالي تتعب وبالتالي مستواها يقع زي ما حصل مع زيزو وفي لعيبة مشيت قبل ما زيزو يجي على سبيل المثال رامي ربيعة وأكرم توفيق هم دول مشيوا ليه؟ دول مشيوا ليه؟ على كلام الكابتن محسن صالح كان ماسك مدير التخطيط أو حاجة زي كده أو رئيس لجنة التخطيط في النادي الأهلي كان بيتكلم من يومين في أون سبورت قال إن رامي ربيعة جاله وقال له أنا يا كابتن لازم ترفع لي ده كلام كابتن محسن مش كلامي أنا لأنه مش ممكن تجيب واحد من بره النادي الأهلي وأنا ابن النادي الأهلي وتديله أدي كذا كذا كذا فالولد ماستحملش مشي ماهو مش هيستحمل إحنا بشر”.
ووجه حديثه للخطيب:” أنا هسأل الكابتن بيبو المحترم سؤال بسيط جداً إنت يا كابتن بيبو مريت بنفس الإحساس ده وعلى فكرة “باي ذا واي” الكابتن خطيب عنده حق إنه ما يجيش واحد عشان هو لاعب جاي من بره أفريقي أو حتى مصري وياخد أكتر منه وهو اللي شايل الفرقة وهو نجم الفرقه يعني وبالتالي إنت مريت يا كابتن بيبو بنفس الإحساس طب النهارده لما إمام أو أي لاعب إمام عاشور بقى اسمه إيه الثاني مروان عطية حسين الشحات رامي اللي مشي أكرم اللي مشي كل دول كوكا الصغير ما هو اتأذوا نفسياً يا كابتن وإنت مريت بنفس الموضوع وهددت بالاعتزال كان لازم تاخد بالك لأن أنا في رأيي هذه هي الطامة الكبرى اللي عملت فورتينة في غرفة ملابس النادي الأهلي والنادي الأهلي ظهر بهذا المظهر هذا هو الأمر”
واختتم:” هذه الأموال التي أنفقت وأهدرت وفقاً للأرقام من جيب أشخاص ولا من جيب النادي الأهلي؟ هذا هو السؤال المطروح”.
