حرص هاني أبو ريدة على توجيه رسالة دعم للحكام المصريين، خلال كلمته في مؤتمر تكريم الحكام المشاركين في كأس العالم، مؤكدًا حجم الضغوط الكبيرة التي يتعرضون لها، وسعي الاتحاد لتطوير المنظومة التحكيمية بشكل مستمر.
وقال أبو ريدة: “الحكام عليهم ضغط كبير والله يكون في عونهم، وأنا عضو في اللجنة اللي بتعدل قوانين التحكيم، وبنحاول نوصّل كل التحديثات للحكام أول بأول”.
وأضاف: “الحكم في الآخر بشر وبيغلط، وإحنا بنستخدم تقنية الفيديو علشان نقلل الأخطاء دي على قد ما نقدر، وأوسكار رويز ولجنة الحكام اشتغلوا كويس جدًا على تطوير الحكام بدنيًا وذهنيًا الموسم ده”.
وأشار إلى وجود تحسن ملحوظ في مستوى التحكيم، قائلًا: “لما بنبص على الأرقام والإحصائيات بنلاقي إن في تحسن واضح، والمؤشرات بشكل عام إيجابية، وإحنا عايزين نزود الشفافية أكتر في موضوع الأخطاء التحكيمية”.
وتابع: “في إنجلترا بيعملوا تحليل أسبوعي أو كل أسبوعين لأخطاء التحكيم، وإحنا بنفكر نعمل حاجة زي كده، ونوضح كل حاجة للناس علشان ميبقاش في أي لبس أو فتنة بين الجماهير”.
واستكمل: “مفيش حاجة هنخبيها، وبنفكر نعمل برنامج أسبوعي بالتنسيق مع الجهات المعنية يشرح كل قرارات التحكيم وكمان تعديلات القوانين بشكل مبسط للناس”.
وشدد أبو ريدة على أهمية توعية الجماهير بطبيعة الأخطاء التحكيمية، قائلًا: “الأخطاء موجودة ودي طبيعة كرة القدم، والناس لازم تفهم إن القوانين بتتغير باستمرار علشان تطور اللعبة، وده شيء طبيعي جدًا”.
واختتم تصريحاته مؤكدًا دعمه الكامل للحكام: “أنا متعاطف جدًا مع الحكام، لأنهم بيتعرضوا لضغوط كبيرة وغير طبيعية، وإن شاء الله الضغوط دي متأثرش عليهم في قراراتهم داخل الملعب”.
