وجه محمد عبدالجليل “جاليليو”، أسئلة هامة لمخرحي مباريات الفريق الاول لكرة القدم بنادي الزمالك بسبب تجاهل تصوير دخلات جماهير الفارس الأبيض.
وقال عبد الجليل،خلال تصريحات تليفزيونية عبر برنامج” زملكاوي”، على قناة “الزمالك”:” حديثي النهاردة عن ملك الاستثناءات.. عن اللي ماشي والناس ماشية وراه ودخلة جماهير الزمالك التاريخية إمبارح “.
وأضاف:” لما تيجي تبص على كتاب وتقول بلاش تحكم من العنوان.. أيوه إحنا مكناش أحسن حاجة، بس إحنا بنعمل فوق الطبيعي.. بص للمشهد كله مش أول صفحة”.
وتابع عبد الجليل:” دلوقتي مش وقت الفلسفة الكروية ولا التحنيك.. دلوقتي وقت دعم وبس.. إحنا قربنا، 7 طيبين وهانت، ونتيجة الذهاب هي اللي صنعت التأهل، الزمالك كان في الأول معندوش حاجة يخسرها، لكن دلوقتي إحنا في النهائي.. خلاص خلونا نفرح، واللي جاي أحسن”.
وواصل:” إنت دلوقتي على خطوة من رقم قياسي، تالت نهائي، وضمنت مليون دولار على الأقل غير مكاسبك، غير فلوس البطولة اللي لو كسبت خدت 4 مليون دولار، غير 500 ألف دولار في السوبر الإفريقي”.
و اشار عبد الجليل:” تصنيفك اتحسن ووصلت للمركز الخامس وتخطيت بيراميدز.. يعني لو في بطولة السوبرليج الزمالك هيضمن المشاركة فيه مازالت عند رأيي الزمالك لسه متمسك بأمله في الدوري .. كل شئ يا كل شئ ودي قناعتي الشخصية “.
وأكمل:” وصلنا لآخر لحظة وإحنا مرعوبين.. بس وصلنا النهائي.. افرح حتى لو شايف نفسك فقير، إنت غني بالوصول ده، واتعلم تفرح وركز في اللي جاي”.
وأكد عبد الجليل:” جمهور الزمالك مش بس مالي الاستاد.. دي مرحلة عدت، الجمهور بيجود دخلة فوق وتحت.. بيعمل ملحمة حقيقية، بعد دخلة بلوزداد في الذهاب قولنا جيم أوفر.. لكن لعنة الملك رجعت وردت الدين، وجماهير بلوزداد نفسها نزلت احترام لجمهور الزمالك في كل صفحاتهم الجماهيرية.. علاقة محترمة وراقية”.
وأردف:” سؤالي مرة ثانية وثالثة بدون قمص بعد اذنكم .. فين الدخلة يا جماعة!! على الهواء الناس دي بتتعب وبتصرف من قوتها عشان تعمل الدخلات.. فين المشكلة لما نشوفها؟ ليه المخرج مبيظهرهاش؟”.
وزاد عبد الجليل: “ليه هناك نشوف الدخلة كاملة وعندنا لأ؟ فين التبرير؟ هل في حاجة غلط؟دخلة الكورفا سود دي مش مجرد منظر.. دي تاريخ بلد كاملة، ولازم تتشاف، حسن النية في الموضوع ده صفر.. مش منطقي أشوف هناك كل حاجة، وعندي هنا ما أشوفش حاجة وأنا في نهائي”
وأستأنف:’ الناس بتزعل ليه؟ ايه يزعل في أننا بنطلب حقنا وبنقول فين الدخلة مشوفنهاش ليه؟ ده كلام يزعل مين!!، زي لما يتقال ناصر منسي أفضل مهاجم في مصر تلاقي اللي يعترض، ولما يتقال بيزيرا أفضل لاعب نفس القصة.. ليه؟ يقولك بالأرقام “.
وشدد عبد الجليل:” طيب ما الأرقام كانت معانا مكنش بيتقال كده، أنا كان معايا الأرقام قبل كده.. عضو مجلس الإدارة لما قال كنت أتمنى ياخد أفضل لاعب في أفريقيا، ردوا عليه وقالوا وفين حسين الشحات؟ ساعتها الأرقام كانت واضحة، دلوقتي بقى مش لاقي غير كلام بيتقال وخلاص .. دلوقتي الأرقام في البنك بس”..
واستطرد: “الكونفدرالية مش بطولة صغيرة زي ما البعض بيحاول يصور.. دي بطولة بتزود رصيدك وبتقوي اسمك وبتبني تاريخك، اللي مش فاهم قيمة الكونفدرالية يسأل نفسه: في نادي خد آخر بطولة سنة 87 وبرضه واخد لقب نادي القرن؟ يبقى البطولات التراكمية هي اللي بتصنع التاريخ”
وأختتم:” مش مفهوم ليه كل الهجوم ده على آراء كابتن هيثم فاروق، رغم إنه بيتكلم بمنطق وبلغة أرقام مش مجرد انطباعات، معرفشي ليه لما كابتن هيثم فاروق يقولك ناصر منسي احسن مهاجم في مصر ناس تتقمص!؟ بيزيرا أفضل وينج في مصر .. ناس تتقمص!”.
