بينما يمتلك الزمالك الروح.. شوبير يجلد الأهلي: تكديس النجوم حوّل الفريق إلى “جسد بلا قلب”
في تحليل صادم يعكس حجم الأزمة داخل جدران المنافس التقليدي، استعرض الإعلامي أحمد شوبير نتائج النادي الأهلي المخيبة هذا الموسم، مؤكداً أن الروح التي يمتلكها لاعبو الزمالك تضعهم في كفة أرجح…”
وقال شوبير، خلال تصريحات تليفزيونية ببرنامج “الناظر”، عبر قناة” النهار”: “تعالى كده أنا وأنت نراجع نتائج النادي الأهلي هذا الموسم، الأهلي اللي بدأ الموسم بخسارة نقطتين أمام مودرن سبورت بعد ما كان متقدم مرتين، فاز على فاركو، تعادل مع المحلة، خسر من بيراميدز اتنين، تعادل مع إنبي 1-1، فاز على سيراميكا بصعوبة 1-0، فاز على حرس الحدود بصعوبة 3-2، فاز على الزمالك في مباراة جيدة 2-1، فاز على كهرباء الإسماعيلية بعد كده 4-0، فاز على الاتحاد بصعوبة 2-1″.
.
و أضاف:” نكمل النتائج.. تعادل مع بتروجيت، ثم تعادل مع المصري بدون أهداف، فاز على وادي دجلة 3-1، رجع تعادل مع البنك الأهلي، فاز على الإسماعيلي (والإسماعيلي ربنا يكون في عونهم في اللي بيحصلهم)، فاز على الجونة بصعوبة 1-0، فاز على سموحة 1-0، تعادل مع زد 1-1، فاز على المقاولون 3-1، خسر من طلائع الجيش 2-1، ثم عاد وتعادل مع سيراميكا 1-1، فاز على سموحة في الوقت الضايع 2-1، ثم عاد وخسر من بيراميدز 3-0″.
وشدد شوبير: “نتائج لا تليق ببطل على الإطلاق، نقاط مهدرة بشكل عجيب جداً.. الأهلي في كاس مصر يخسر من الاتصالات، الأهلي في بطولة أفريقيا بيخرج أمام الترجي هزيمة ذهاباً 1-0 وإياباً 3-2، الترجي بقاله ست ماتشات مكنش سجل في مرمى الأهلي أهداف. هل ده النادي الأهلي؟ هل دي نتائج النادي الأهلي؟ هل دي لعيبة النادي الأهلي؟ هل دي عروض النادي الأهلي؟”.
وواصل:” ما هي الأخطاء التي وقع فيها النادي الأهلي واللي كلنا وقعنا فيها؟ إنه الأهلي اعتمد على ‘تكدس النجوم’.. زيادة النجوم في أي فرقة معناها كارثة”.
وأشار: “سياسة تكديس النجوم، سياسة الأسماء واللعب على الأسماء فقط لا غير دي كارثة.. اللعيب مش باسمه، اللعيب بجهده وعطائه وعرقه وإمكانياته وإنه يموت نفسه في الملعب. يعني حتى مع إن تريزيجيه النهاردة مكنش كويس لكن بتحس إنه بيجري، لكن مفيش حد في الملعب، مفيش حد في الأهلي.. اللي هو مفيش حد! يعني أنت كأهلاوي وأنت قاعد بتتفرج على الماتش معندكش أدنى ثقة”.
وزاد شوبير:” كان الكابتن ضياء السيد بيتفرج معايا فبيقولي ‘مفيش أي نوع من أنواع الإبداع، كورة جامدة كورة ناشفة’، قالي ‘وبعدين حتى الجول الأولاني وهم بيطلعوا مبيعرفوش يعملوا Build up من تحت، العب طويل، اتقطعت، اتشاطت، خبطت، خدت إيد مصطفى شوبير ودخلت وهكذا’.
و أستطرد:” فين الأهلي؟ بص مهند لاشين عامل إزاي؟ بصوا الروح هنا عاملة إزاي؟ بصوا الشكل عامل إزاي؟ ده الهدف في النادي الأهلي.. هل ده معقول يا جماعة؟ تشوف الروح بتاعة إنبي بالمقارنة بالروح بتاعة النادي الأهلي مفيش مقارنة، إنبي تفوز.. شوف الروح بتاعة بيراميدز بالمقارنة بالنادي الأهلي مفيش مقارنة، بيراميدز يفوز.. رغم تعادل الزمالك النهاردة لكن على عدد المباريات تشوف الروح بتاعة الزمالك بالمقارنة بروح لعيبة النادي الأهلي، الزمالك يفوز”.
وأكد شوبير: “في أخطاء قاسية داخل النادي الأهلي، خلينا مع النادي الأهلي شوية يا جماعة.. في أخطاء قاسية، أخطاء صعبة، أخطاء غريبة داخل النادي الأهلي. هو قبل المباراة تحس إنهم واقفين ومشدودين ومش عارف إيه، ويبدأ أول 10 دقائق كويس أوي بعد كده فين النادي الأهلي؟ مش موجود النادي الأهلي. أنا بحاول أكون هادي شوية الحقيقة لأن أنا عارف إن جماهير الأهلي في حالة غضب شديد جداً وحالة انفعال وحزن شديد جداً.. بص مهند لاشين بص شكله عامل إزاي؟ بص مصمم إزاي؟ بص الإصرار؟ بص جماهير النادي الأهلي بتعيط بتبكي في المدرجات مش مصدقة، لأنها مشافتش كده في النادي الأهلي من قبل”.
و أتم:” خسارة قاسية ومهينة للنادي الأهلي وفوز رائع وكبير لنادي بيراميدز تتجدد آماله، والأهلي للمرة الثانية يعطي قبلة الحياة ليورشيتش مدرب بيراميدز، لأنه بعد المباراة الأولى كان على وشك إنه يمشي، كسب النادي الأهلي فكمل، وأدي المباراة التانية الراجل كان على وشك إنه يمشي أعتقد إنه كده بقى مكمل بعد هذا الفوز الكبير جداً، وأول مباراة أشوفه هادي النهاردة على الخط.”
