علق الإعلامي عمرو أديب، على خسارة الأهلي أمام بيراميدز، بثلاثية نظيفة، ضمن منافسات بطولة الدوري، ووجه رسالة هامة بشأن الزمالك.
وقال أديب،خلال تصريحات تليفزيونية عبر برنامج “الحكاية”، على قناة” ام بي سي مصر”:” قلبي يقطر دماً، بالتلاتة .. هتقول لي على إيه يا عمرو؟ أقولك انبساطي إن الأهلي اتغلب أكتر كتير من خوفي إن بيراميدز ياخد الدوري”.
و أضاف:” خليكوا حقانيين، هو الأهلي لعب كورة السنة دي؟ يعني الأهلي إيه؟ الأهلي عمل أي حاجة؟ بيراميدز ده فريق ليه خطوط أول وتاني وتالت وإمكانياته، وإحنا غلبناه”.
وتابع أديب:” بس إن شاء الله بعون الله الأهلي يعني لن يأخذ الدوري، بيراميدز لن يأخذ الدوري، الزمالك هو إن شاء الله اللي هياخد الدوري السنة دي”.
وأكمل:” أنا بس مش عايز حضراتكم تبقوا زعلانين ولا متضايقين، أنا عارف إنه غالبية مصر أهلاوية، بس هذا الأمر ابتدى يتحرك شوية، أنا بقيت يا جماعة أمشي في الشارع أشوف زملكاوية”.
وشدد أديب:” فقلبي يقطر دماً إن إمبراطورية الأهلي بدأت في الانتهاء، أنا بقول لحضراتكم إن الزمن خلاص الدنيا ما هي عشريات، العشرية دي إن شاء الله زملكاوية، العشرية اللي فاتت كانت أهلاوية، العشرية ديت زملكاوية بيراميدزية، فيه حالة كروية في مصر الأشياء تتغير”.
وأشار:” وتسأل ليه يا صديقي صغير في السن تتحدث عن إمكانيات الأهلي ولعيبته؟ الفرقة اللي فيها زيزو وإمام عاشور وتريزيجيه إزاي مابتكسبش؟ أنتوا عارفين التلاتة دول بكام؟ التلاتة دول تمنهم تمن اللعيبة اللي موجودة في الزمالك كله.. كله!”.
و أردف أديب:” النهاردة الأخ الفاضل معلق المباراة في الجون التاني يقولك متعملش كدة.. ميعملش كدة ليه؟ ميغلطش كدة ليه؟ “.
و أكمل:” الزمالك عامل موسم كويس والزمالك بإمكانيات قليلة عامل موسم عظيم.. وبيراميدز بإمكانيات رهيبة، في الصف الأول والصف التاني والصف التالت، والناس بتلبس هدوم جاية من مش عارف فين والفتلة بتاعتها عاملة إزاي، والأحذية بتاعتهم موزونة على مقياس ريختر، وكل ده وفي النهاية ناس عندها إمكانيات”.
وزاد أديب:” النهاردة بصراحة الزمالك مضيع خمس ست جوان على الأقل، جوان جوان جوان جوان، كان واحد منهم كان دلوقتي كان ليلة ليلة وحاجات كدة.. فهذا يوم يجب أن نعلم فيه إن الأهلي لن يأخذ الدوري، يعني من الأول كدة.. هتقول لي بيراميدز ولا الزمالك؟ أقول لك أشوف، إنما النهاردة يا ولاد الأهلي لن يأخذ الدوري وهذا أمر مهم العمر ويخلي الأمر آخر نجف، آخر عنب، آخر لذاذة”.
وأختتم:” وأرجو أن تكون هناك مواجهة مع الذات، مواجهة مع مجلس إدارة الأهلي، مواجهة مع جمهور النادي الأهلي إن النادي الأهلي في أسوأ حالاته.. هو إحنا يا جماعة ليه الزمالك يوم ما بيبقى سيء وبيبقى في أسوأ حالاته ومجلس الإدارة متفسخ ومش عارف إيه يقعدوا يقولوا لنا الزمالك تعبان، ده أنتوا لعيبة مش عارف إيه، ماعندكمش بتاع، ما معكمش فلوس تسافروا، فيه خناقات”.
