علق الإعلامي مهيب عبدالهادي، على تأهل الزمالك لنهائي الكونفدرالية،بعد تخطي عقبة شباب بلوزداد الجزائري في نصف نهائي البطولة.
وقال مهيب، في تصريحات تليفزيونية عبر برنامج “اللعيب”، على قناة” ام بي سي مصر”:” مبروك للزمالك الصعود للنهائي، كانت مباراة في المتناول وكان ممكن النتيجة تبقى أفضل، لكن مباريات نصف النهائي والنهائي ليها حساباتها الخاصة”.
وأكمل:” جمهور الزمالك حاجة تفرّح بجد، حاجة فل الفل، وعودة للزمن الجميل للزمالك والبطولات، تحس إن الزمالك بيرجع لنفسه، الزمالك رغم كل المشاكل، في الأول وفي الآخر هو الزمالك، نادي كبير بيقدر يرجع في أي وقت”.
وشدد عبد الهادي:” الجماهير هي اللي بترجع الزمالك، وكل الأعمار موجودة، أسر كاملة جاية تشجع، ومشاهد جميلة نحب نشوفها من غير تعصب ولا رمي”.
وواصل: “جمهور الزمالك مدرسة الفن والهندسة، وهم اللي كسبوا المشهد النهارده، منظر بقالنا سنين مشوفناهوش، محيط الاستاد كله كان أبيض، الزمالك فن وهندسة وممثل مصر في أفريقيا، وكلنا بندعمه”.
و أردف عبد الهادي:” الزمالك ضمن أول مليون دولار، ولسه قدامه 3 مليون كمان لو كسب البطولة، وده ممكن يساعد في حل أزمات كتير، قدامه ماتشين ياخد البطولة و5 ماتشات في الدوري، المرحلة الجاية مهمة جداً”.
وأشار: “السؤال هنا: اللعيبة كانت بتفكر في إيه؟ هل دي تعليمات المدير الفني ولا كان فيه خوف؟، التأهل مهم طبعاً، لكن كان ممكن الأداء يبقى أقوى، بدل ما تفرح بالتأهل وتخاطر إنك تستقبل هدف”
وأتم: “طول ما دي رؤية المدير الفني، يبقى كل الدعم ليه، ونتمنى دي تكون بداية للي جاي، صعب تتخيل البطولات الأفريقية من غير الزمالك، ونتمنى نشوفه دايماً في دوري أبطال أفريقيا”.
