أشعل الإعلامي أحمد شوبير الجدل بتصريحات نارية عقب السقوط الصادم للنادي الأهلي أمام بيراميدز، في مباراة كشفت الكثير من الأزمات الخفية داخل الفريق الأحمر.
الهزيمة الثقيلة بثلاثية نظيفة جاءت ضمن منافسات الجولة الرابعة من الدوري المصري الممتاز، لتدفع الأهلي للتراجع إلى المركز الثالث برصيد 44 نقطة، وسط حالة من القلق بسبب تذبذب النتائج.
وخلال حديثه الإذاعي قال: “خلّينا نتكلم بصراحة كده، عشان جمهور الأهلي مستني مني أقول الحقيقة… الواقع بيقول إن الأمور مش كويسة خالص، بل أقدر أقول إن الوضع جوّه النادي الأهلي سيء جدًا.”
وأضاف: “كل المحاولات اللي اتعملت من الإدارة، سواء الكابتن محمود الخطيب أو سيد عبد الحفيظ أو ياسين منصور، ما جابتش النتيجة المطلوبة كلها فشلت، المدرب سافر ورجع، واتغيّر في شخصيته وطريقته، ولعب ماتش ودي مع زد وكسب 3-0… بس برضه المشكلة لسه موجودة، مش مشكلة واحدة… دي مشاكل كتير، ومحدش عارف سببها الحقيقي إيه.”
وواصل: “لو بصّينا على الجهاز الفني، هنلاقي ده تالت مدرب في الموسم… بدأنا بريبيرو كمشروع وممشيش، بعد كده عماد النحاس واشتغل كويس شوية، لكن كان فيه رغبة في مدرب أجنبي، فجالنا مدرب عنده خبرات في الدوري الألماني وكسب الدوري الدنماركي… يعني CV محترم.”
وقال: “بس السؤال المهم: إيه اللي بيحصل؟! لو حطيت نفسك مكان جمهور الأهلي، مش هيفرق معاه مدرب مشروع ولا غيره… هو عايز يكسب وبس. الفريق فيه نجوم كتير، نفسهم اللي خدوا الدوري السنة اللي فاتت، ومعاهم صفقات جديدة… طب ليه الشكل كده؟”
وأضاف: “فيه أخطاء واضحة جدًا… الدفاع فيه مشاكل، ومفيش مهاجم صريح يخلّص الهجمة صح، وده أنا اتكلمت فيه قبل كده. كمان فيه جدل على طول في موضوع التشكيل… لو لاعب لعب ووحش بيتهاجم، ولو قعد احتياطي الناس تسأل ليه ما بيلعبش!”
واستكمل: “مفيش لاعب حاليًا في مستواه الطبيعي… والنادي نفسه طلع بيان قبل كده بعد ماتش الترجي وقال فيه أخطاء إدارية وفنية وإنهم بيحاولوا يصلّحوها… بس الجمهور خلاص اتعب من تكرار نفس الكلام.”
وأشار: “لما تبص على النتائج هتلاقي الفريق ضيّع نقط كتير، خسارة وتعادلات، واستقبل أهداف كتير… وده عمره ما كان أسلوب الأهلي.”
واختتم كلامه: “أنا مش هقدر أأكد إن فيه خلافات جوّه، بس ممكن يكون في تأثير من السوشيال ميديا وآراء الجمهور على قرارات زي التعاقدات… وده ممكن يضر الفريق. زمان كنا عارفين إن كل واحد ليه دوره… اللاعب لاعب، والمدرب مدرب، والإداري إداري… دلوقتي الأدوار بقت داخلة في بعض، وده ممكن يكون سبب التراجع رغم البطولات اللي اتاخدت قبل كده.”
