”كلام كبير زيادة عن اللزوم”.. شلبي ينتقد رد فعل “مصدر الأهلي” على عزومة ممدوح عباس لياسين منصور
خرج الإعلامي مدحت شلبي بتصريحات “من العيار الثقيل”، تناول فيها كواليس دعوة ممدوح عباس رئيس الزمالك الشرفي، لنائب رئيس الأهلي ياسين منصور، لحضور نهائي الكونفدرالية بين الفارذ الأبيض واتحاد العاصمة، موجهاً في الوقت ذاته انتقادات لاذعة للسياسة الإعلامية داخل الاحمر.
وقال شلبي، خلال تصريحات تليفزيونية ببرنامج” يا مساء الانوار”، عبر قناة” “mbc مصر 2″:” حصل رواج كبير قوي، إنه العزيز الغالي الأستاذ ممدوح عباس، وهو طبعاً محب كبير لنادي الزمالك ورئيس شرفي لنادي الزمالك ورجل بيقف بكل كيانه وإمكاناته المادية مع النادي طبعاً طبعاً، عمل “تويتة” مفادها إنه هو عزم الأستاذ ياسين منصور المحترم نائب رئيس النادي الأهلي بصفته صديقه على المباراة النهائية الكونفدرالية”.
و أضاف: “قريت بقى مصدر من النادي الأهلي -مبحبش حكاية “مصدر صرح” والكلام ده كله- مصدر من النادي الأهلي قال “ده مش هينفع الكلام ده مش هيحصل ومش هيروح على الإطلاق لهذه المباراة ومش عارف إيه”، كلام برضه كبير زيادة عن اللزوم”.
وتابع شلبي:” يا جماعة إحنا من لمدة من شهر واحد بس لغاية النهاردة، قدامي أهي البيانات، كم بيان يا جماعة النادي الأهلي عمل؟ 11 بيان في شهر! يعني تخيلوا إحنا زمان لما الأهلي ده يقول لك “في بيان هيصدر بعد قليل” دي الدنيا كلها بتستنى النادي الأهلي هيقول إيه”.
وأشار: “وممكن السنة كلها تعدي ما يطلعش بيانين تلاتة النهاردة شهر واحد 11 بيان! 11 بيان! لازم تراجعوا يا جماعة -ما أقصدش إطلاقاً أقلل من حد والله، لكن راجعوا المنظومة الإعلامية، والصديق الغالي الأستاذ جمال جبر ميزعلش من كلامي ده، لأنه ده النادي الأهلي. لما النادي الأهلي يصدر بيان يبقى الدنيا كلها مستنية البيان، لكن مش ممكن كل شوية، بقول لحضراتكم 30 يوم فيهم 11 بيان يعني يومين والتالت بيان، يومين والتالت بيان.. مش ممكن ده مش معقول على الإطلاق”.
وواصل شلبي:” طيب نرجع للدعوة دي، أنا كنت أفضل -وكلام موجه للإنسان اللي أنا بعتز بيه شخصياً واللي معايا علاقات طيبة جداً جداً أستاذ ممدوح عباس- كنت أفضل لو تسألني أنا عن رأيي، إن توجه دعوة رسمية من نادي الزمالك إلى النادي الأهلي”.
وسدد شلبي:’ كنت أفضل زي ما أول ما نجحتوا دعيتوهم وجُم والكلام ده كله طبعاً. هنا واحد يقول لي “أنت يا عم بتتكلم في إيه؟ أنت مش شايف النادي الأهلي عمال ياخد مننا إمام عاشور وياخد مننا زيزو وبيدور على مش عارف مين”.
وأكمل:” بقول لكم بس حتة صغيرة قوي في الحتة دي عشان إحنا بقى عندنا حساسية “أوفر” من الانتقالات. خلي بالك، مسألة انتقال لاعب من نادي إلى نادي منافس هذا أمر طبيعي جداً جداً. حتة بقى إنه إمام عاشور كان غنى أغنية ضد الكابتن صالح أو مش عارف إيه، ده موضوع آخر أنا ماليش دخل بيه، هذا يقبله أو لا يقبله النادي الأهلي ومسؤوليه، مش دي قصتي”.
و أردف شلبي:” أنا قصتي مسألة انتقال لاعب من هنا لهنا أو من هنا لهنا عادي جداً، إحنا عاملين منها موضوع. أنا جبت لكم بس كده كم اسم كده في السريع بصرف النظر عن الظروف اللي اتنقلوا فيها يعني، الكباتن من غير ما نقول كابتن فلان وعلان، فيما يتعلق بانتقالات من الأهلي للزمالك مثلاً: جمال عبد الحميد، حسام حسن وإبراهيم حسن، حسين ياسر المحمدي، حسن مصطفى، أحمد حسن، دومينيك دا سيلفا، كل دول اتنقلوا من الأهلي للزمالك عادي جداً”.
و أستكمل: “سيبك بقى من ده “متقيدش فراح” أو “بقي ونُقل”، لكن في النهاية انتقلوا من الأهلي للزمالك. العكس من الزمالك للأهلي: رضا عبد العال -كان انتقال تاريخي- معتز إينو، مؤمن زكريا، صبري رحيل، إمام عاشور، محمود عبد المنعم كهربا، أحمد سيد زيزو.. عادي جداً جداً جداً”.
وأختتم:” طيب نروح لبعض الأمثلة العالمية عشان تفهموا إن الموضوع ده طبيعي جداً، لويس فيجو ده كان نجم النجوم، اتنقل من برشلونة لريال مدريد كان سنة 2000. لويس إنريكي من ريال مدريد لبرشلونة، كارلوس تيفيز من مانشستر يونايتد لمانشستر سيتي، روبين فان بيرسي من أرسنال لمانشستر يونايتد، كل دول إيه اللي هم الأندية المتصارعة، رحيم ستيرلينج من ليفربول لمانشستر سيتي، كريم بنزيما”.
