أكد المهندس هشام نصر، نائب رئيس نادي الزمالك، أن النجاحات التي يحققها النادي في الفترة الحالية هي نتاج تخطيط واستراتيجية واضحة، مشدداً على أن “روح الجماعة” داخل غرفة ملابس الفريق كانت العامل الحاسم في الوصول إلى نهائي كأس الكونفدرالية الأفريقية وتصدر جدول الدوري الممتاز.
و قال نصر في تصريحات تليفزيونية عبر برنامج “ملعب أون” على قناة “أون سبورت”:” مبروك لجماهير نادي الزمالك أولاً، مبروك لمجلس الإدارة، مبروك لجهاز الكورة، مبروك للاعيبة المحترمين المضحيين المتماسكين “.
و أضاف:” مبروك لجون إدوارد وجهازه كله الكامل، ربنا يوفقنا والحمد لله إن إحنا وصلنا فاينال، لسه خطوتين إن شاء الله، وإن شاء الله ربنا هيكرمنا بالإخلاص وبالجمهور اللي ورانا”
وتدخل الإعلامي سيف زاهر قائلا:” عشان ندي كل واحد حقه بمنتهى الصراحة، لأن أنا ما اتكلمتش عنه، جون إدوارد ياخد العلامة الكاملة، وأعتقد إنه قدم أوراق اعتماده بغض النظر عن نتائج الحصول على البطولة من لا، ولكن الراجل بصراحة عمل اللي عليه وودى التجربة إلى بر الأمان”
ليرد نصر:” الحمد لله، أكيد تركيزه وتحمله للصعاب النادي كله قابلها، وإصراره على إنه يكمل التجربة، فأنا بشكره من منصتك هو والتيم كله اللي معاه، كابتن معتمد جمال حاجة ولا أروع، الحالة اللي موجودة بين اللعيبة”
وشدد:” أوضة اللبس حط تحتيها 100 خط، أوضة اللبس الحمد لله ربنا يديمها علينا نعمة، الاستقرار والتضحية لحد ما ربنا يكرمنا إن شاء الله”.
وعاد سيف زاهر:”هسأل حضرتك سؤال بس أتمنى إن حضرتك ترد عليا بمنتهى الصراحة المعهودة اللي أنا متعودها معاك؛ مش بسأل حضرتك هنا على أمنياتك لأن أنا عارف أمنياتك، أنا بسأل حضرتك على توقعاتك، كنت متوقع في بداية الموسم أو الأحداث الكتيرة اللي حصلت إن ممكن أعمل معاك مداخلة زي كده أقول لك مبروك في توقيت زي ده وأنت موجود في نهائي الكونفدرالية وأنت متصدر جدول الدوري الممتاز؟
ليجيب نصر:’ بص يا سيف، أنا الحمد لله مؤمن بالتخطيط وإن يبقى عندك رؤية واستراتيجية تمشي عليها، وأكيد ربنا في الآخر بيكلل المجهود بحاجة كويسة:” الفوز والمكسب بييجوا في آخر مرحلة خالص، وبيبقى فيه توفيق من ربنا، لكن لما تبذل مجهود كبير طبيعي ربنا يكرمك”.
و أكمل: “أنا شخصياً شايف إن الشغل بياخد وقت، زي فريق الباسكت النهارده الحمد لله كسب في نصف النهائي وهيلعب النهائي في كأس مصر، وده نتيجة شغل وتعب”.
وزاد نصر:” عندنا مشاكل في الإمكانيات والكل عارفها، وده بيخلّي الوصول للأهداف ياخد وقت، لكن البناء الصح لازم نصبر عليه لحد ما نوصل للي بنحلم بيه، أنا دايماً متفائل وبتمنى أكسب كل البطولات وفي كل وقت، لكن أحياناً الظروف بتبقى عائق قدامك”.
واتم:” طبيعي يكون فيه أخطاء، مفيش إدارة في الدنيا كاملة، كل إدارة بيبقى فيها نسبة أخطاء، لكن طول ما فيه إخلاص وإصرار وإنكار ذات، أكيد ربنا بيكرمنا في الآخر”.
