تحدث الإعلامي مدحت شلبي، عن رغبة إمام عاشور، لاعب الأهلي في تقاضي راتب يتساوي مع زميله في الفريق أحمد سيد زيزو، مؤكد ان الأحمر رفض هذا الامر.
وقال شلبي، خلال تصريحات تليفزيونية ببرنامج يا مساء الانوار، عبر قناة “mbc مصر 2″:” كل القنوات طبعاً بدأت تتكلم في موضوع آدم وطني وتصريحاته المثيرة للجدل في توقيتات غريبة وعجيبة، وهل هي مقصودة إن هي تبقى في هذا التوقيت؟ عنده ثلاث أربع تصريحات اليومين اللي فاتوا دول يثيروا الجدل”.
وأضاف: “حصل حديث في إمكانية عودة محمد عبد المنعم من فرنسا إلى النادي الأهلي، طلع وقطع وجزم وكيله قال لك ما فيش حاجة من دي هتحصل ولن يعود محمد عبد المنعم إلى النادي الأهلي. طلع اتكلم عن مصطفى محمد وقال سيبقى في أوروبا ولن يعود إطلاقاً إلى مصر، لأن برضه كان في كلام إن الأهلي عايز وأنا الحقيقة برضه نصحت مصطفىقلت له فرقتك دي مش هتجيب أوت، وفعلاً نزلوا”.
وواصل شلبي:” تحدث أيضاً عن محمد عبد الله، قال هيكون خارج الأهلي أيضاً ولن يعود للأهلي، لدي اتفاق معهم وأنا متأكد إن هم يحترموا كلامهم. الطامة الكبرى اللي كل القنوات اتكلمت فيها الحقيقة هي مسألة إمام عاشور؛ قال لك إمام عاشور لن يبقى الموسم القادم في النادي الأهلي. إمام عاشور طبعاً كلنا عارفين إنه فاضل له سنتين، لكن مشكلته تكمن في العقود العالية الخاصة بزيزو وتريزيجيه وبن شرق”.
وشدد: ” إمام شايف إن هو لا يقل أهمية، وتصريح غريب لأنه هل أنت تملك إن أنت تمشيه الموسم القادم؟ والأغرب من وجهة نظري وهذه البلبلة، إن إمام نفسه مطلعش لا كذب ولا أكد، ما يقدرش يأكد طبعاً بس يقدر يكذب فما حصلش”.
و أردف شلبي: “وفقاً للكلام في النادي الأهلي اللي واصل لنا إنه هو كان طالب تجديد عقده بقيمة مالية مرتفعة، عايز يقرب من زيزو، وهو طبعاً أفضل من زيزو ‘باي ذا واي’ . الأهلي قفل قال لك مفيش كلام خالص في العقود اليومين دول، عندنا حسين الشحات لأن عقده انتهى، وعندنا كوكا وترضية مصطفى شوبير لأن عقده صغير قوي ويستحق أكتر من كده”.
وأختتم:” دماغ إمام خلاص راحت في الفلوس، رضيت أم أبيت، صدقت أو مصدقتش، هي راحت في السكة دي، لأنه مش قادر يتحمل من جواه إن حد أقل منه فنياً -ودي حقيقة من وجهة نظري- وأكتر منه مادياً، فبدأت الأزمات تشتد”..
