بسبب “هدايا” القمة.. عمرو أديب يفتح النار على نجوم القطبين ويحذر من “كارثة” في المنتخب
في واحدة من أقوى ردود الفعل الإعلامية عقب مباراة القمة، شن الإعلامي عمرو أديب هجوماً حاداً على لاعبي الأهلي ونادي الزمالك، واصفاً الأداء الفني في الملعب بـ “الخلل الكروي” الذي يهدد مستقبل المنتخب الوطني، كونه يعتمد بشكل أساسي على هؤلاء اللاعبين.
وقال أديب، خلال تصريحات تليفزيونية ببرنامج “الحكاية”، عبر قناة “mbc مصر”:” في خلل كروي والله في البلد، يعني في مشكلة ما حدش فاهمها وده هيبان في المنتخب بعد كده لأن الناس ديت مش لعيبة، يعني مش فنانين، يعني مش أعظم.. هو ده قوام المنتخب على فكرة. الجون جون المنتخب، المدافعين هم مدافعين المنتخب، المهاجمين هم مهاجمين المنتخب؛ كابتن إمام عاشور، وكابتن زيزو، وكابتن شوبير، و كل الكباتن اللي هو منتخب مصر. اللعيبة دي مش كويسة، أنا بقول لك اللعيبة دي مش كويسة”.
و أردف: “طب هو إمام عاشور عمل إيه النهارده؟ أهو قولي إمام عاشور عمل إيه النهارده؟ ماذا فعل إمام عاشور؟ بن شرقي ما بيلعبش معانا في المنتخب، جايز يدوله الجنسية بعد كده. هل ده معقول؟ هل كل سنة وكل وقت طيب؟”.
و أكمل أديب:” سؤال لنادي الزمالك: زي ما ضيعتوا ماتش إنبي، ناويين تضيعوا سموحة أو سيراميكا؟. لو الزمالك ما أخدش الدوري السنة دي أنا هزعل قوي.. ما أعترف.. ما أنا مش قادر أقولها. 63 سنة بشجع فرقة ما بتكسبش”.
وواصل: “بقول لك النهارده هدايا، لفة هدايا حلوة، اتفضل يا كابتن لفة الهدايا، اتفضل يا كابتن البلنتي، اتفضل يا كابتن لفات هدايا، أنت قاعد فيونكات بقى وبتاع وشرفية وبفيونكة على البتاع، ولما تفتحها تقول لك أهي! أنا الأهلي نادي مش عارف إيه، نادي عظيم، نادي جبار. هل ده يرضي حد؟ طب أنا بستشهد بكل واحد، أنا عارف الأهلاوية غاويين كورة وناس محترمين، أنتم شايفين إن اللي حصل ده النهارده كويس؟”.
وأكد اديب:” أنتم شايفين في ناس كاتبة تقول لك أه عمرو أديب بقى هيطلع يندب لنا دلوقتي. أنت عايزني أعمل إيه؟ أطلع أقول بصراحة بكل روح رياضية ومش عارف إيه زي الناس بتوع البرامج الرياضية بقى؟ النادي الأهلي بصراحة لعب؟ لا ما لعبش ماتش ولا عملوها النهارده ولا حاجة خالص. أصل النادي الأهلي بص.. أهنئ.. لا ما بهنئش النادي الأهلي، لو الأهلي النهارده كان لعب كورة كنت أقول لك، لعب كورة فين؟ هو المدرب ده كان يعني عامل حاجة النهارده عظيمة؟ كان فيه خطة عبقرية؟ كان فيه شيء جبار؟ يعني أنا تعبت، عمرو تعب”.
و شدد:” اتفضل طبعاً افرح يا عمي وطير وارقص وغني وبتاع وابعتوا كيدة فيّ. أنا مصر كلها بعتة لي (شيء في قلبي يحترق 1)، (شيء في قلبي يحترق 2)، (شيء في قلبي يحترق 3). أنا مركب دعامة يا عالم! إيه يعني الرحمة.. هل ده معقول؟ اللي حصل النهارده يقول لك إيه: هيطلع ينوح بقى. طب أعمل أطلع أعمل إيه؟ ده أنا أول الدوري، ده أنا قاب قوسين أو أدنى ولكن ما أشبه الليلة بالبارحة، والبارحة اللي قبل البارحة، والبارحة اللي قبل قبل البارحة.. تولع البارحة! أنا تعبت من البارحة”.
وأشار أديب: “ألف مبروك للنادي الأهلي وهارد لاك لنادي الزمالك. وأنا خارج من الكوردور واحد بيقول لي معلش دي كورة.. أنت يعني.. أنا كنت فاكرها بطيخة مثلاً، مانجا، قلقاس! ما أنا عارف إنها كورة يا حبيبي. الكلام بقى البايخ بتاع الناس اللي مالهاش في الحمقة والتعب والحاجات دي، أنا عارف إنها كورة مش أي حاجة تاني. شيء في قلبي يحترق، شيء في قلبي يحترق، شيء في قلبي يحترق وكنت خايف إنه يبقى أربعة، أنا كنت قاعد في آخر الماتش خايف إنه في شيء في قلبي احترق أربعة وشيء في قلبي يحترق تلاتة ومش عارف إيه كده، معلش”.
وأختتم:” المهم خلينا نفكر إن شاء الله ناخد الدوري لأنه لو ما أخدناش الدوري والزمالك ما أخدش الدوري السنة دي. أنتم عارفين أنا هعمل إيه، كل الناس عارفة أنا هعمل إيه”.
