في ليلة كروية عاصفة، خرج الإعلامي عمرو أديب بتصريحات مثيرة للجدل عقب خسارة نادي الزمالك أمام غريمه التقليدي النادي الأهلي بثلاثية نظيفة، واصفاً ما حدث بأنه “خروج عن قوانين المنطق والعدالة الكروية”.عمرو اديب
وقال أديب،خلال تصريحات تليفزيونية ببرنامج الحكاية عبر قناة” mbc مصر”:” شغلتنا قايمة على إني أقول لك الخبر الجديد، أطلع أقول لك خبر جديد، هو ما فيش جديد هي نفس الغلاسة والرزالة، هو نفس الموقف ما فيش حاجة بتتغير، أي حاجة في الدنيا بتتغير، أي فرقة مرة تكسب ومرة تخسر إلا الأهلي والزمالك”.
وتابع: “فجأة الأهلي النهارده قرر يبقى فريق بطولات، قرر إن يبقى فيه الروح بتاع الفانلة الحمراء، قرر إن كل اللعيبة اللي فيه تبقى عظيمة، قرر إن الجمهور بتاعه يبقى جبار، قرر إنه يعمل كل الأشياء البايخة الرزلة الغلسة اللي ما فيهاش إنسانية، اللي ما فيهاش لزازة، اللي ما فيهاش عدالة، فرقة بتكسب برجلين الزمالك. يعني هم جايبين تلات جوان الزمالك اللي مديها لهم، حسام عبد المجيد هو اللي مدي الأجوان ومضيع بينالتي، فالنهارده الأهلي لم يفعل شيء”.
وواصل أديب:” الأهلي خد الحاجة اللي هو دايماً ياخدها والزمالك خد إيه الحاجة اللي هو دايماً بياخدها؟ النكد والهم، يا جماعة عايز بس أقول لكم على حاجة بشويش كده عشان جمهور نادي الزمالك كمان ما يتنقطش زي ما أنا هتنقط، أنت بتلعب قدام فرقة فيها خمسة ستة سوبر دوبر جامبو بلايرز؛ تريزيجيه، إمام عاشور، بن شرقي. أنت بتلعب قدام فرقة طائرة مع فيها لعيبة سوبر، فرقة منزلة لعيب اسمه زيزو كابتن منتخب مصر يلعب آخر خمس دقايق بـ 80 مليون جنيه عشان يلعب خمس دقايق، ما أنت كمان بتلاعب مين؟ أنت بتلاعب فرقة عندها سكواد، عندها لعيبة، عندها إمكانيات، عندها فلوس، وأنت غلبان بتكمل المرتب لآخر الشهر”.
وشدد: “هل أنا كنت فاكر إن إحنا هنكسب النهارده؟ أبداً أبداً، أنا سجلت بإيدي قلت لكم النهارده مش هنعرف نكسب، إنما هو فين العدل؟ يعني هو فين فرقة ما لعبتش الموسم كله، هو الأهلي ده لعب بنكلة السنة دي؟ ولا الهوا”.
وتساءل أديب:” هو الأهلي ده فريق كويس السنة دي؟ ولا ليه لازمة هو الأهلي ده عمل أي حاجة السنة دي؟ ولا نعرف حاجة. كل اللي عمله الأهلي إنه لعب ماتش النهارده بس، ماتش النهارده وكالعادة دايماً كل الماتشات في الدقيقة 15، 16، 17، 18 أول ما يبتدوا يولعوا النور وألقى كل الكلام اللطيف ده الأهلي يجيب جول، أي ماتش للأهلي والزمالك عامل كده، أي ماتش لازم الأهلي يتقدم ثم يتقدم ثم يتقدم، وأنت تتأخر ثم تتأخر ثم تتأخر”.
وأكمل: “هو ده دوري؟ هو ده ينفع؟ هي دي منافسة؟ هي دي كورة؟ هو حاجة ينفع تبقى عاملة كده طول الوقت؟ إن الأهلي يكسب ثم يكسب ثم يكسب، يا جماعة في فرقة تجيب جونين من كورتين راجعين من الدفاع؟ في حاجة كده في الدنيا؟ ماتش سوبر، كل الكور ليه الأهلي لما بيهاجم الزمالك يبقى مفتوح وليه الزمالك لما بيهاجم الأهلي مقفول؟”.
وأشار أديب:” شوف كل هجمات الأهلي، الأهلي طالع باتنين، بتلاتة، بأربعة، كأنه راكب طيارات إف 16، الملعب كله مفتوح، تريزيجيه يلعب كده وبن شرقي يلعب. يا جماعة بن شرقي جايب جون كورة شراب، الكورة اللي هو عامل كده، روح خد، ادي الكورة أهو، الكورة بتجيله إزاي؟ جتله منين؟ الجونين اللي قبل كده جم إزاي؟ جم منين؟ فالأهلي بيطلع، الطيارات طالعة الإف 16، الإف 35 كلهم طالعين والملعب مفتوح كده، الزمالك بقى لما وترقيصة على رأي علاء الحامولي الله يرحمه، لما وترقيصة.. قال له أنت بتنشن فيها يا راجل!”.
وزاد: “الزمالك ياخد الكورة ويجري يجري يجري ويسبها هناك ويرجع، ويجري يجري ويسبها هناك ويرجع. هو في حاجة كده؟ فرقة ما عندهاش واحد.. إحنا وصلنا لمرحلة إنه بينك وبين الجون أربع ياردات والعيال بقت خايفة تشوط! يعني أنت واقف عند الجون، لا في الأهلي بقى بيشوط في أي حتة، من أي مكان، ما هو عارف، ما هو عارف إن الحظ معمول له، هتخبط في واحد وتدخل، هتخبط في إيده وتدخل، هترجع وتدخل. حظ حظ حظ لا يتوقف لا يتوقف”.
و أردف أديب:” قولوا لي بالله عليكم ماذا فعل الأهلي اليوم؟ يعني أنا عايز حد كده يطلع يقول لي لا لا بس الأهلي النهارده بقى كان.. قولي كان عامل إزاي أو كان فيه إيه أو إيه الشيء العظيم اللي عمله الأهلي؟ لا شيء لا شيء، ومع ذلك أنا أحيي النادي الأهلي بفوزه وتقدمه 3-0. على فكرة يا جماعة الأهلي بالنسبة له والأهلاوية كلهم يروح الدوري ويروح الكأس وتروح الكونفدرالية بس المهم إنهم يكسبوا الماتش ده وينكدوا على عمرو أديب، ده مزاج ده إكسلانس كده”.
واستطرد: “أنا ماشي في الشوارع النهارده الناس كلها يا عم فيه إيه؟ استنى هنكسب، يا عم استنى.. طب يعني أنا مالي؟ فأنا ملاحظ إنه الموضوع كمان تحول إلى مسألة شخصية جداً، مش شخصية تجاه عمرو لا، تجاه نادي الزمالك. هو إحنا مش هنلعب في الدوري كله؟ إحنا هنجيب لعيبة بالمليارات بس ما يلعبوش حاجة، الأهلي يبقى ضعيف، الأهلي يبقى تعبان، التلات مدربين اللي قاعدين في البيت بيقبضوا مرتبات بالدولار على حساب ميزانية النادي الأهلي إنما (At the end of the day) إحنا ننكد على الزمالك يوم الزمالك”.
وأسهب أديب:” يا جماعة النهارده أنا بتفرج على شيء غير طبيعي وغير منطقي، يعني أنا قاعد أقول طب إزاي دي؟ وإزاي؟ والبينالتي، في فرقة يجيلها في الموسم 15 بينالتي تضيع تمنية؟ تمنية؟ ده أنت ما عندكش لعيبة خالص، يعني أنت اللي أنت وصلت له ده أنت واصل بمعجزة، أنت واصل ببركة دعا الناس”.
و أسترسل: “طيب إيه اللي هيحصل بعد كده؟ كمل أنت بقى الماتشين اللي باقيين دول سموحة وسيراميكا مش كده؟ والأهلي باقيله إيه؟ باقيله المصري وسموحة صح؟ طب اتفرج على اللي هيحصل واتفرج إزاي ممكن الأهلي يروح واخد الدوري من الزمالك ومن بيراميدز ولم يفعل شيء ولم يلعب شيء ويجي يقول لك إيه: لا الأهلي نادي عظيم نادي جبار”.
وأستكمل أديب:” مش حرام اللي بيجرى ده يا جماعة؟ أنا تعبت أنا بجد تعبت، هو مش من جد وجد ومن زرع حصد؟ النادي ده قبل الماتش ده بيقولوا لازم نمشي رئيس النادي، يعني بيتكلموا إن الأسطورة محمود الخطيب لازم يمشي، ويقول لك الروح، روح إيه؟ روح مين؟ ده أنا روحي اللي طلعت!”.
وأختتم:” يقول لك روح إيه، هو ده نادي عنده روح؟ بقول لك النادي ده لأول مرة في تاريخه وفي أول مرة في حياته يبقى فيه ناس بتتكلم إن محمود الخطيب لازم يمشي، فالنادي اللي بيقول محمود الخطيب اللي جاب لهم كل الدوريات ديت واللي اشترى كل اللعيبة دي بالمليارات فجأة بيقول لك لا الروح عالية وإحنا ما عندناش مشكلة أصلا”.
