رغم الخسارة امام اتحاد العاصمة.. أيمن يونس يشيد بذكاء معتمد جمال ويؤكد “زعلان جدا من لاعب الزمالك”
رغم مرارة الخسارة في ذهاب نهائي الكونفدرالية، إلا أن الكابتن أيمن يونس، نجم الزمالك السابق، بعث برسائل طمأنة وثقة لجماهير “القلعة البيضاء”، مؤكداً أن سيناريو مباراة “5 يوليو” لم يكن يعكس الفوارق الفنية الحقيقية بين الفريقين
وقال يونس، خلال مداخلة هاتفية ببرنامج “ملعب أون”، عبر قناة” أون سبورت”: “ضيعنا فوز، ضيعنا فوز ما ضيعناش تعادل حتى. فرصنا كانت قريبة قوي إننا نحقق حلم جماهيرنا ونحسم المباراة أو الشوط الأول بشكل مباشر لينا”.
وتابع:” بصراحة، لازم نبتدي نشكر واحد زي محمد شحاتة، واحد بالظروف دي (وفاة والده) ونزل النهاردة وكان مقاتل رائع، في الظروف الإنسانية اللي هو فيها دي ويلعب بالأداء ده، لازم أشكره بعيداً عن النتائج وبعيداً عن كل حاجة”.
وشدد يونس: “الامل كبير، وإستاد القاهرة هيشهد على تاريخ جديد لنادي الزمالك.. ومتوقعين من جماهيرنا ولعيبتنا إنه يحصل يوم تاريخي يوم السبت القادم’.
و اشار:” زعلانين، لكن الفارق الفني لصالحنا، وفارق الأداء لصالحنا. معتمد جمال النهاردة عمل ماتش من ماتشاته الجميلة في توضيب لعيبته في المهام الهجومية والدفاعية، عملها 10 على 10، لكن صدفة سوء توفيق في حاجات صغيرة قليلة كتير”.
و أكمل يونس: “مش عايزين أتكلم على التحكيم والله علشان معملوش شماعة، لكن الهدف اللي اتلغى بتاع عدي الدباغ، والكرة بتاعة شيكوبانزا كانت جول رسمي، لكن الحكم شاف إنه حصل التحام، وهو ما كنش فيه أي نوع من أنواع الالتحام، وكان يستاهل يرجع للفار وهو ما رجعش”.
و أكد:” زعلان قوي من بنتايك، مالهاش لازمة إنك تتوتر لدرجة إنك تطرد، إنت مؤثر في فرقتنا ومالهاش لازمة، شوط أول وخرجنا مغلوبين بسوء بخت لينا وليس لفارق فني”.
وأختتم: “أعتقد يوم السبت القادم هنحسم إن شاء الله الفوز ونحتفل ببطولة مهمة قوي في تاريخ نادي الزمالك”.
