كشف الإعلامي إبراهيم عبد الجواد كواليس وتفاصيل الجلسة الهامة التي جمعت الكابتن معتمد جمال، المدير الفني لنادي الزمالك، بمدافع الفريق الدولي حسام عبد المجيد، وذلك في إطار سياسة “الاحتواء النفسي” التي ينتهجها جمال لإعادة الثقة للاعبيه قبل الحسم في مواجهات الدوري والكونفدرالية.
وقال عبد الجواد، خلال تصريحات تليفزيونية ببرنامج “ملعب أون”، عبر قناة “أون سبورت”:”جلسة جمعت ما بين الكابتن معتمد جمال ولاعبي نادي الزمالك، ولكن في واحدة من الجلسات المهمة جداً كانت مع حسام عبد المجيد. وعاجبني جداً وبحترم جداً أسلوب وطريقة إدارة الكابتن معتمد جمال لعلاقاته مع لاعبي نادي الزمالك”.
وأضاف:” هي علاقة أخوية على مدير فني على أبوية، يعني ميكس كده حلو، اللعيبة تحبه اللعيبة تحترمه اللي هو أنا بحترم مدربي وبخاف منه وبحبه، ميكس كده جميل يخليك طول الوقت فيه رابط إنساني ما بينك وما بين المدير الفني قبل ما يكون رابط ليه علاقة بالفنيات أو إن هو مديري أو رئيسي أو مديري الفني في الفريق”.
وأردف عبد الجواد: ” الجلسة دي أكد فيها الكابتن معتمد جمال على إن حسام عبد المجيد -وهو محق في ذلك- واحد من أفضل إن لم يكن أفضل مدافع موجود في الدوري المصري في هذا الموسم، واحد من أفضل اللعيبة اللي في هذا المركز في الدوري المصري، وإنه أداء سيء في لقاء بالطبع لا ينعكس على أداء حسام عبد المجيد في الموسم كله”.
وواصل: “فأكد لحسام إن ‘يا حسام إنت عملت موسم هايل، إنت واحد من أفضل مدافعين مصر، إنت واحد من الأعمدة الرئيسية لمنتخب مصر الأول ماتش راح وماتش للنسيان، إنت لعيب محترم لعيب كبير لعيب عندك إمكانيات عالية، واحد من أفضل المدافعين الموجودين في الدوري المصري كله مش بس الزمالك”.
وشدد عبد الجواد:” يكفي إنه الزمالك هو أقوى خط دفاع في بطولة الدوري استقبلت شباكه 17 هدف فقط لا غير، يأتي في المركز الأول بعديه بيراميدز والسيراميكا اللي دخل في مرماهم 19 هدف”.
و أكمل:” فبالتالي يا حسام ماتش للنسيان ومثل هكذا مواقف هي اللي بتبين وتبرهن على صلابة وقوة وعقلية اللعيب إنه يعرف يتجاوز أي موقف صعب، وما في لعيب كبر شأنه أم صغر شأنه، كبر اسمه أم صغر اسمه، ما بيمرش بماتشات بيبقى الـ ‘Day off’ بتاعه ويوم مش يومه، تعديه وتبص على اللي بعديه وتكمل موسم مميز إنت عامله”.
وأشار عبد الجواد: ” حتى لما حسام كان بيتكلم وبيلمح إلى إنه ما يشوطش بينالتيز تاني كابتن معتمد قال له ‘إنت واحد من أهم المصنفين، إنت المصنف الأول شيل الكلام ده كله من دماغك، ركز في اللي جاي، ماتشين عند الفرقة وعندك نكسبهم ونبقى أبطال الدوري، ده الكواليس اللي حصلت ما بين الكابتن معتمد جمال وحسام عبد المجيد”.
و تابع: “أزيدك بقى من الشعر بيت وبوجه كلامي لحسام: يا حسام إنت من الشخصيات المحترمة، لعيب جامد لعيب كبير، ماتش إنت أو غيرك من اللعيبة في الأهلي في الزمالك في أي نادي ده ماتش ما تحكمش بيه على مسيرتك. أنا دايما بقول إن حسام عبد المجيد واحد من أفضل العقليات اللي موجودة في مصر لأنك لو تفتكر وترجع بالزمن كم سنة لورا، حسام عبد المجيد طلع مع بعضاً من لاعبي الناشئين في نادي الزمالك؛ هو وسيف جعفر ومحمد طارق ويوسف أسامة نبيه، وسيد نيمار، وكان في حد خامس أنا ناسي، الخمسة كلهم ما حدش فيهم كمل إلا حسام، هو اللي طور من مستواه بقى واحد من أهم أعمدة نادي الزمالك ومنتخب مصر”.
وأختتم:” فأي لعيب بيمر بالمواقف اللي شبه كده، والمواقف دي هي اللي بتبين وبتبرهن على قوة عقلية وشخصية اللعيبة الكبيرة.
معسكر مغلق مهم جداً، كابتن معتمد جمال مهتم قوي إنه يقعد مع اللعيبة، مهتم قوي إن يكون في لمة بينه وبين اللعيبة، بيقول لهم إن هم الأسبوعين دول الـ 10 أيام دول فيهم كل حاجة من تعبكم وشقاكم ورجولتكم على مدار الموسم تحصدوها في الأيام دول بلقاءي الكونفدرالية ولقاءي سموحة وسيراميكا كليوباترا”.
شاهد:
