كشف الإعلامي إبراهيم عبد الجواد ، كيف يفكر معتمد جمال، المدير الفني للزمالك، لمواجهة اتحاد العاصمة، في مواجهة حسم لقب الكونفدرالية، وكذلك بديل المغربي محمود بنتايج.
وقال عبد الجواد، خلال تصريحات تليفزيونية، ببرنامج “ملعب أون”، عبر قناة “أون سبورت”: بخصوص استعدادات نادي الزمالك لمواجهة اتحاد العاصمة الكورة للرجالة والجدعان وأنتم أجدع الجدعان، الكورة للشقيان وأنتم شقيتوا وتعبتوا وعفرتوا وتستحقوا تاخدوا البطولة. أنا هنا بتكلم على رجالة نادي الزمالك، رجالة مدرسة الفن والهندسة”.
وأشار:” مش بتكلم ده عشان أنا مصري فبشجع فريقي المصري اللي موجود في بطولة أفريقيا وممثل مصر الوحيد فعايزه يكسب، لا أنا بتكلم الكلام ده لأن فعلاً لو حيّدت نفسك بره أي حب لفرقة بلدك، الفرقة دي والرجالة دي استحموا السنة دي وعملوا اللي ضد المنطق”.
وشدد عبد الجواد: “هم أحسن فرقة في الكونفدرالية، كانوا أحسن في لقاء الذهاب وكانوا يستحقوا ياخدوا المكسب، والزمالك عادة على مر تاريخه المتتبع له يعرف إن الزمالك ده عكس المنطق، عز ما الدنيا كلها تبقى ضده، عز ما الظروف تبقى حالكة السواد، تلاقي الفانلة البيضا بخطين حمر دي بتنور وبتزدهر وبتطلع في السما”.
وتابع:” يوم السبت اللي جاي ماتش الرجالة دول عشان يجيبوا البطولة اللي يستحقوها، وماتش اللعيبة دول عشان يراضوا الجمهور العظيم اللي وقف جنبهم وساندهم في “الوحشة” قبل ما تكون “الحلوة”، فهم يستحقوا السنة دي يفرحوا فرحة كبيرة بالكونفدرالية يوم السبت اللي جاي على استاد القاهرة، اللي أنا متأكد إنه هتلاقيه متقفل بجمهور نادي الزمالك العظيم.”
و أضاف عبد الجواد: “نروح للتفاصيل الفنية وآخر الكواليس من داخل نادي الزمالك عشان تعرفوا إيه اللي بيدور في ذهن كابتن معتمد جمال:خبر سعيد: “خوان بيتزيرا” جاهز بنسبة 100% في هذا اللقاء وهيكون موجود”.
وواصل: “كابتن معتمد جمال بيحاول يعمل بعض التفاصيل التكتيكية اللي مش كبيرة ولكنها مهمة عشان يفاجئ بيها فريق اتحاد العاصمة، وهيكون ورقته اللي هيستخدمها في القصة دي هو بيتزيرا، إنه يخش في قلب الملعب شوية أو يبقى على الطرف”.
وأكمل عبد الجواد:” بيفكر يبدأ اللقاء بالثنائي عدي الدباغ وناصر منسي لأنه عايز يعتمد على كثافة عددية في الـ 18، وعايز يكون فيه “كروسات” كتيرة جداً ويضغط من أول ثانية عشان يسجل هدف مباغت في أول 15 دقيقة يفتح له الجيم”.
وزاد: “كان فيه لقطة شياكة في لقاء الذهاب إنهم خلوا محمد شحاتة يرتدي شارة القيادة، وبيفكروا برضه في لقاء العودة إنه يرتدي الشارة في لقطة كلها أصل وجمال، وده تكملة لموقف مسؤولي قطاع الكورة (جون إدوارد، عبد الناصر محمد، وعبد الرحمن إسماعيل) اللي زاروا أهل محمد شحاتة في مسقط رأسهم بالمنيا لتقديم واجب العزاء (في والده)، وإن شاء الله يا شحاتة تكسب البطولة ويكون إهداء لوالدك”.
وأختتم:” بديل بنتايك؟ سيكون أحمد فتوح مع وجود إيشو على مقاعد البدلاء. كابتن معتمد جمال مش “هيتفزلك” ومش هيحاول يعمل حاجة خارج الصندوق، هو هيخلي التعديلات في أقل الحدود الممكنة لأنه معاه أوراق محدودة جداً، فاستقر على فتوح في مركز الباك الشمال، بالتوفيق لنادي الزمالك في مباراته القادمة يوم السبت’..
