لأول مرة.. محمد إسماعيل يكشف ماذا قال جون إدوارد للاعبي الزمالك بعد خسارة الكونفدرالية
أوضح محمد إسماعيل، نجم الزمالك، تفاصيل حوار جون إدوارد، المدير الرياضي للفارس الأبيض، مع اللاعبين عقب خسارة الكونفدرالية.
وقال إسماعيل خلال تصريحات تليفزيونية عبر قناة “أون سبورت ماكس”: في ماتش اتحاد العاصمة اللعيبة رجعت من تلقاء نفسها ليه؟ “تعب.. إحنا كنا تعبانين لأن إحنا كنا آخر تلات أربع ماتشات أغلبية الفرقة كانت بتلعبها مصابة كنا دايماً بناخد المسكنات وكده عشان نلعّب فـ ده اللي خلانا على الأقل نحافظ على النتيجة دي وممكن نكسب”.
و أضاف:” جرّبنا نضغط مرة واتنين، الضغط ما نفعش، فعشان كده رجعنا، هو ده السبب طب لكن السبب الأكبر اللي هو التعب، كلنا ما حدش كان زعلان من التاني، إحنا كنا عارفين الأسباب إحنا لو قادرين وكنا بدنياً قادرين كنا ضغطنا وجبنا الكورة أول ما تتقطع مننا كمان كالعادة كما بنعمل لكن التعب كان واصل لمرحلة كبيرة جداً.”
وشدد إسماعيل: “إحنا كان في الذهاب كنا برضه بنشتغل كـ بندافع وبنلعب على الهجمة المرتدة فـ ده الناس ما حستش بالموضوع ده، لكن إحنا هنا كنا مطالبين بنهاجم فده محتاج مجهود أكبر ونضغط فده ظهر التعب في النقطة دي”.
وردا على سؤال جون إدوارد شخصياً تدخل بعد نهاية المباراة وقال للاعيبة بعد ما حس إن في تنشنة زيادة شوية: ‘مش هنخسر بعض عشان ماتش، واللي جاي هو الهدف الحقيقي، التأهل لدوري أبطال أفريقيا، ناخد الدوري، هو ده المهم. ده حقيقة حصل؟”
ليجيب إسماعيل: “آه حصل، كان دايماً بتدخل في الماتشات اللي إحنا ما بنعملش فيها نتيجة كويسة هو دايماً عنده فكر اللي هو بيفكر لقدام، ولما اتكلم معانا بعد الماتش إن إحنا ما نخسرش بعض، لسه في بطولة تانية، إحنا لو خدنا البطولة ديت كل حاجة هتتنسي، هنفرح الجمهور وهنختم السنة بشكل كويس فـ ده أدانا أمل ساعتها إن إحنا لا خلاص يعني، الماتش وعدى وما أثرش علينا وما نخسرش بعض”.
ما معنى ما نخسرش بعض دي اللي هي ترجمتها في الكورة إن كله بيلوم بعضه؟ كل الناس بتلوم بعضها على اللي حصل؟ : “لا مش شرط عادي، ما نخسرش بعض اللي إحنا نفقد الثقة في بعض، آه”.
