ليست مجرد مباراة.. الونش يفسر لماذا يختلف نهائي السبت عن أي يوم آخر ورسالة خاصة للجمهور- فيديو
في تصريحات حملت الكثير من مشاعر المسؤولية والثقة، خرج “صخرة” دفاع نادي الزمالك، محمود حمدي “الونش”، ليتحدث عن كواليس الاستعداد للملحمة الإفريقية المرتقبة في إياب نهائي كأس الكونفدرالية. الونش لم يتحدث فقط كلاعب، بل كقائد يدرك تماماً حجم الضغوط التي تحيط بمثل هذه المواعيد الكبرى.
وقال الونش، في تصريحات صحفية:” طبعاً كلنا عارفين أهمية الماتش، وطبعاً السيناريو بتاع الماتش الأولاني كان صعب علينا شوية، فالحمد لله اللعيبة لعيبة كبيرة وقدرت تتجاوز الموضوع في يعني يوم أو يومين بعد ما رجعنا من الجزائر”.
وتابع:” فالحمد لله إن شاء الله اللي عندنا.. خلصنا شوط هناك ولسه في شوط هنا في القاهرة في وسط جمهورنا على أرضنا ووسط جمهورنا، إن شاء الله اللعيبة دي تعبت وتعبنا طول الموسم وكل اللي إحنا بنشتغل عليه الفترة دي إن إحنا نحاول إن إحنا نطلعهم من الضغوطات لأن إحنا عارفين لما يبقى تعب موسم كله محطوط في ماتشين”.
وشدد الونش: “فإحنا هناخد ماتش ماتش، ماتش الكونفدرالية وإن شاء الله بإذن الله يكون التوفيق من نصيبنا كده بإذن الله، وإن شاء الله الجمهور اللي هيشرفنا يروحوا مبسوطين كلهم إن شاء الله.”
وردا على سؤال باعتبارك من قادة الفريق ومش أول ماتش نهائي قاري تلعبه مع نادي الزمالك، ممكن الناس تكون متوقعة إن السيناريو هيكون صعب شوية، إن الفريق الجزائري يكون متراجع، ممكن شوية تضييع وقت.. إيه الحل للتعامل مع ده؟ أجاب : “يعني والله كل فرقة بيبقى ليها وجهة نظر في طريقة لعبها، لكن إحنا عندنا هدف نازلين نطبقه إن شاء الله بنتمرن عليه، وإن شاء الله ننزل أكيد على أرضنا هيبقى الموقف مختلف وهنبقى ضاغطين من أول ثانية وإن شاء الله بإذن الله التوفيق زي ما قلت لك يبقى من نصيبنا كده والنتيجة تتيسر معانا في الأول إن شاء الله، ومع ضغط الجمهور إن شاء الله الموضوع هيبقى مختلف وإن شاء الله التوفيق لينا بإذن الله.”
رسالة لجمهور نادي الزمالك؟: “يعني جمهور الزمالك أنا مش عارف أقول إيه أكتر من إن أنا بشكرهم على دعمهم الدائم معانا، وطبعاً عن تعب الموسم كله سواء من لعيبة أو مجلس إدارة أو جهاز فني، هما حاسين باللي إحنا عملناه السنة دي، فإن شاء الله بإذن الله إحنا كالعيبة حاسين برضه باللي الجمهور عمله في ضهرنا وعمله معانا الفترة اللي فاتت دي كلها، ورانا في كل المحافظات وفي كل البلاد بره حتى بره مصر كلهم بيبقوا ماليين العدد اللي بيبقى محطوط لينا، فبشكرهم على تعبهم معانا وإن شاء الله بإذن الله كلنا كدة نفرح يوم السبت إن شاء الله، وبشكرهم مرة تانية وإن شاء الله كلنا مستنينهم في الاستاد ويروحوا مبسوطين.”
من المقرر أن تقام مباراة الزمالك واتحاد العاصمة يوم السبت الموافق 16 مايو 2026، على ستاد القاهرة الدولي، في تمام الساعة التاسعة مساءً بتوقيت القاهرة.
يُذكر أن الزمالك قد خسر لقاء الذهاب بنتيجة (1-0)، حيث يحتاج الفريق للفوز بفارق هدفين لحسم اللقب القاري.
شاهد:
