أكد محمد عبد الكريم، المدرب العام لنادي سيراميكا كليوباترا، أن مواجهة فريقه المرتقبة أمام نادي الزمالك في الجولة الختامية للدوري المصري ستكون “مباراة للتاريخ”، مشدداً على أن فريقه يدخل اللقاء بهدف تقديم كرة قدم ممتعة تليق بحجم الطموحات التي وصل إليها النادي هذا الموسم.
وقال عبد الكريم، خلال مداخلة هاتفية ببرنامج” أوضة اللبس”،عبر قناة” النهار”: “إحنا علينا فعلاً ضغط، حسمنا للمركز الرابع اتأخر أوي كنا نتمنى إحنا كجهاز فني نحسمه من بدري لأن كان عندنا فرصة لده، فحطينا تحت ضغط أكتر. أداءنا في ماتش المصري ما كانش أحسن حاجة، ما كناش كويسين وقلنا للاعيبة ده، إحنا ما جيناش الماتش”.
و أضاف:” فإنك بعدها بأربع خمس أيام تقدر تحضر اللاعيبة لماتش كبير زي بيراميدز، فالحمد لله حضرنا كويس أوي زي ما حضرنا ماتش الأهلي بالظبط. درسنا بيراميدز نفس الطريقة، بيحبوا أطراف وكروسات وعندهم لاعيبة مميزة، قدرنا النهارده نغير الطريقة، لعبنا بتلاتة مع اتنين مع بالحاج والسولية في نص الملعب، حضرنا اللاعيبة كويس أوي. فالحمد لله النهارده يعني الشوط التاني ممكن يكون اتضغطنا شوية وده راجع للاعيبة المضغوطة عايزين ياخدوا النقطة”.
و شدد عبد الكريم: “النقطة دي لو كانت جت بدري شوية إحنا كان عندنا فرصة في ماتش إنبي بعد التعادل مع النادي الأهلي ودخل فينا جون في آخر الماتش اللي فات دخل فينا جون صعب جداً لو اتكرر 10 مرات مش هيدخل يعني. فكنا عايزين نحرر اللاعيبة من الضغط ده، لكن الحمد لله النهارده ربنا بيكافئنا بنقطة مهمة جداً مع فرقة محترمة طبعاً فرقة عندهم لاعيبة عندهم حلول كتير جداً فالحمد لله بقول الحمد لله بشكر اللاعيبة على الأداء وعلى الروح اللي عملوا بيها النهارده”.
وواصل:” ما نقدرش نعوض الكابتن علي ماهر، وجوده معانا على الخط بيدي طمأنينة إن إحنا لينا كجهاز وكلاعيبة مدينا ثقة، لكن ظروف اتحطينا فيها. الحمد لله أنا اتحطيت فيها قبل كده في ماتش الزمالك كان الكابتن علي في المغرب وقدرت أحقق المكسب، لكن كله من تحت إيد الكابتن علي. هنتأثر؟ هنتأثر، لكن هنحاول”.
وأشار عبد الكريم:” إحنا عندنا 15 يوم هنحاول نحضر كويس للزمالك. ماتش مهم بس أنا بقولك من دلوقتي الماتش هيبقى فيه كورة حلوة أوي، إحنا بالنسبة لنا هنقدم كورة حلوة أوي وهنعمل اللي علينا والنتيجة دي بتاعة ربنا. لأن إحنا قلنا للاعيبة كده النهارده برضه”.
وأردف: “إحنا محطوطين أه والناس عمالة تقول بيراميدز وزمالك وسيراميكا، ما كناش حاطين ده في دماغنا، حتة الدوري دي أكيد ربنا كاتب هيروح لمين، لكن إحنا نعمل اللي علينا والباقي على ربنا. فالنهارده ربنا كافأنا إن إحنا ارتحنا وتشيل الضغوط من علينا شوية عشان نقدم إن شاء الله مباراة تليق باللاعيبة دي وبإدارة النادي وبالجهاز ده”.
وزاذ عبد الكريم: ضغوط بدنية وضغوط إن الزمالك عنده ماتشين مهمين جداً ببطولة وإن شاء الله الزمالك يحققها، وأتمنى إحنا كمصريين سواء فنيين أو بنشتغل في الكورة أو غير الكورة أتمنى إن شاء الله الزمالك يحقق البطولة دي. هيبقى عنده مضغوط طبعاً، مضغوط ماتشات وسفر وكده، إحنا بالنسبة لنا هيبقى عندنا أريحية شوية نعمل استشفا”.
وأكمل:” إحنا حققنا المركز الرابع، والجهاز ده يحقق خمس سنين مركز رابع مع أندية مختلفة ويلعب أفريقيا ده الحمد لله تعب تعب كبير جداً من الجهاز الفني وتضحيات لينا ولأولادنا وأسرنا فعلاً بنضحي كتير جداً. الكابتن علي حاططنا تحت ضغط بس المهم النجاح، فبقول الحمد لله و ببارك فعلاً للجهاز ده لأن هي صعبة جداً فده بتبقى نجاح لمدرب مصري لمدرب مصري فبقول الحمد لله “.
وردا على سؤال هل هذه النجاحات ممكن إن هي تخلي الكابتن علي ماهر على أعتاب الانتقال إلى نادي آخر صاحب أهداف أكبر وصاحب أحلام أكبر تساعد الكابتن علي ماهر إن هو في يوم من الأيام يبقى مدرباً لمنتخب مصر؟ اجاب عبد الكريم: طبعاً ده مش في إيدينا، إحنا في إيدينا الشغل، في إيدينا القرار بتاع النادي أو النادي الكبير أو الأندية الكبيرة اللي عايزة تتعاقد مع الكابتن علي دي في إيديها هي، هم شايفين. لكن إحنا بالنسبة لنا أه طبعاً الكابتن علي عنده طموح يوصل لأبعد حاجة زي أي مدرب، لكن إحنا طموحنا نوصل لأعلى حاجة، طموحنا نحقق حاجة تانية أحسن”.
واختتم:” إحنا كنا نتمنى السنة دي كانت فرصة بس الظروف ما ساعدتناش إحنا كنا عايزين نحقق مركز أحسن من الرابع وكان فرصة عندنا، إحنا ضيعنا بنط. لكن في الآخر في ظروف غصب عننا، إصابة إسلام عيسى، إصابة عمرو قلاوة، عبد الله ما كانش جاي فترة، إصابة عمر كمال، ففي حاجات جوه الكواليس حصلت لنا، حصل الدروب ده. لكن في الآخر إحنا حققنا هدف من أهداف النادي اللي كنا من أول ما جينا كنا بنسعى ليها يعني، لكن موضوع إن إحنا نمسك أو الكابتن علي ده أكيد السادة المسؤولين أو السادة المدربين أو السادة المحللين هم يقدروا”..
شاهد:
