في حلقة استثنائية من برنامجه “الحكاية” على شاشة “إم بي سي مصر”، عبر الإعلامي عمرو أديب عن سعادته الغامرة بفوز نادي الزمالك بلقب الدوري العام، واصفاً هذا الإنجاز بأنه “معجزة حقيقية” تحققت في ظل ظروف وتحديات صعبة مر بها النادي.
وقال أديب عبر برنامج” الحكاية” على قناة “ام بي سي مصر”:” يطيب ليا أن أتقدم بالتهنئة لـ50 مليون مصري على فوز نادي الزمالك بالدوري العام، فوز مستحق، فوز جميل، فوز حلو.. وزملكاوي، أيوه فلتفرح مصر.. أبيض يا أبو خطين، إيه الجمال ده؟ إيه الحلاوة دي؟”.
و أردف:” نقطة نظام هامة؛ إخواننا وأعزائنا في النادي الأهلي عندما يفوزون بالدوري محدش بيفتح بقه: “إحنا الأهلي، إحنا العظماء، أنتم في المركز الثاني، المركز الثالث، نادي القرن، نادي العظمة،؟” تمام، حلو خليك أنت كده، أنت هتفضل على طول الثاني والثالث، أنت عمرك ما هتمشي شغال”
وزاد أديب:” طيب.. عندما نفوز بالدوري وهي معجزة حقيقية يقولك: “في إيه الدوشة اللي أنتم عاملينها دي؟ إيه يعني، ما هو كان حاجة مهمة حصلت، عادي جداً، إحنا خدنا الدوري ده 100 مرة قبل.. طب لا لا، أنتوا مش قد كده، كل يوم الناس تاخد الدوري، عادي موجود في أي سوبر ماركت، في إيه؟ لا، إيه الطيارة اللي نزلت دي عشان تسلّم الدرع؟ ده الدرع ده كان لازم تاخدوه سكيتي، ما حدش يعمل دوشة”.
وواصل:” وكل ده كوم والحكاية اللي طلعوها قبل ما اللعيبة تسيب الملعب بتاعة بلحاج وهو بيلعب البينالتي وقالوا بيغمز لعواد عشان يقول له هيحط البينالتي فين، ما كانوا اتفقوا من قبل الماتش: أقول له حطها على الشمال يا عواد، عواد ينط عشان’.
وأكمل أديب: “معقولة يا جماعة؟ معقولة؟ فين الروح الرياضية؟ فين مبروك وتستحقوا ونادي الزمالك نادي جميل، بالدم بالروح الدوري مش هيروح.. كل الحاجات الحلوة دي فين يا جماعة؟ إحنا نادي بيلعب عشان يعيش، أنتوا بتعيشوا عشان تلعبوا، إحنا اللقمة مش لاقيينها، إحنا غلابة إحنا مساكين إحنا موقوفين إحنا ما عندناش لعيبة، ورغم ذلك أبى الله إلا أن يتم نوره ويقدر نادي الزمالك يحقق هذه البطولة العظيمة”.
وأضاف:” أيوه أنا زملكاوي وأفتخر، أيوه أنا زملكاوي ومبسكتش، والزمالك نادي عظيم، نادي جبار، نادي بطولات، هو ليه يا جماعة مستكترين علينا الفرحة؟ أنتم مش عايزينّا ننبسط؟ دي سنة الحياة، وإحنا على طول لازم نخسر؟ ما إحنا لسه خسرانين الكونفدرالية، يقول لك: “لا لا هو المفروض الأهلي نادي قوي يقدر يكسب”.
وأسهب أديب:” وإحنا بنلعب الثلاث ماتشات دول مع بعض، أنا كان هيجرى ليا حاجة آخر 10 دقايق، كنت ماشي قدام التلفزيون رايح جاي، أعصابي تعبانة ومش مصدق، والأهلي عايز إيه؟ الزمالك يتغلب وبيراميدز يتغلب وهو ياخد الدوري.. ده معجزة صغيرة يعني، لازم يعود عصر المعجزات عشان الأهلي ياخد دوري بلا لعب”.
وشدد:” الأهلي عنده كل لعيبة مصر، الأهلي عنده منتخب مصر كله، الأهلي عنده ربع فرقة الزمالك، الأهلي عنده كل الفلوس، وبعدين إيه؟”.
و أستطرد أديب:” حاجة غريبة جداً بعد الماتش في استوديوهات التحليل؛ اللي أنا فاهمه إن استوديو التحليل يتكلم ليه فاز الزمالك بالدوري، مش كده؟ لكن أغلب استوديوهات التحليل بتتكلم: ليه الأهلي خسر الدوري؟ وأنا مالي وأنا مالي؟ “.
و أكد:” أنا بطل الدوري يا جماعة، ادونا مكاننا، ادونا البريستيج بتاعنا، ادونا الفرحة بتاعتنا.. يقول لك: “لا الأهلي خسر عشان..”، وأنا مالي الأهلي خسر ليه؟ ما تتكلموا الزمالك كسب ليه، الزملكاوي هو اللي تعب معانا، هو اللي وقف وراء ناديه، هو اللي شال التراب سنين، هو ده الزملكاوي اللي أعرفه”.
وتابع أديب:” إنما الزملكاوي اللي عايز يبقى.. يا جماعة أنا ما ينفعش أبقى أهلاوي، كل واحد يقول إيه: “تبقى إيه يا أهلاوي؟” أنا زملكاوي وأفتخر. ألف مبروك على نادي الزمالك”.
وواصل:” يوم الاثنين الجاي عندنا لعيبة محترمة من نادي الزمالك، كل سنة أقول لهم يا جماعة عايز أستضيف نادي يقولوا لي ليه؟ عايز أستضيف ناس من مين؟ الناس ما بتستضيفش لا الثاني ولا الثالث ولا الرابع ولا الخامس ولا السادس، فالسنة دي أستطيع بكل راحة إن أنا أستضيف لعيبة الزمالك يوم الاثنين، لعيبة الزمالك هيكونوا منورين عندنا إن شاء الله في برنامج الحكاية”.
وانهى:” ألف مبروك، لعيبة مخلصة، لعيبة تعبت، لعيبة عظيمة، لعيبة بتحب ناديها.. ألف مبروك”.
