شن الإعلامي سيف زاهر دفاعاً قوياً عن المدير الفني لنادي الزمالك معتمد جمال، مؤكداً أن الحديث عن رحيله أو عدم تجديد عقده بعد الإنجازات التي حققها في ظل الظروف الصعبة يعد أمراً “صعباً وغريباً”، ولا يمت للعدالة الكروية بصلة.
وقال زاهر، خلال تصريحات تليفزيونية ببرنامج” ملعب أون”، عبر قناة” أون سبورت”: “أنا بسمع إن معتمد جمال جايله عروض ومعتمد جمال الزمالك بيفكر يبقى موجود ولا ما يبقاش موجود”.
و أردف:” هل واحد زي معتمد جمال وصل نهائي الكونفدرالية، أخد بطولة الدوري الممتاز في عز الظروف الصعبة دي ممكن يبقى في أي حتة غير الزمالك؟، ممكن ما يتعملوش عقد سنة؟، أعتقد إن المشهد هنا هيبقى صعب وغريب شوية، لأن في النهاية أنت بتصدر لقطة، بتصدر مشهد بتقول النهارده إن اللي بيتعب بيلاقي وإن اللي بيجتهد بيكون فيه يعني مكافأة وبيكون فيه حق بياخده”.
وواصل زاهر: “هنا أعتقد إن اللي.. لو رحل معتمد جمال ما أعتقدش إن هو ده هيكون الصح، وهو ده هيكون العدل، بل بالعكس أعتقد إن الراجل اشتغل في ظروف صعبة جداً جداً وقدر يعمل نجاحات كبيرة جداً”.
وشدد:” تجربة جون إدوارد نجحت بشكل كبير، كابتن حسين لبيب ومجموعته نجحوا بشكل كبير، لأن عايز أقول لحضراتكم برضه حاجة، ما ينفعش إن أفضل أمسك مجلس أنتقده طول السنة وأجي بعد كده النجاح هقول ده بتاع جون لوحده، أصل ده بتاع علي لوحده، أصل ده الأستاذ ممدوح لوحده، أصل ده فلان لوحده، تحت شعار “يا نعيش عيشة فل يا نموت إحنا الكل، مفيش الكورة كده يا كله هينجح يا كله هيفشل”.
و أكمل زاهر:” الزمالك نجح السنة دي، نجح بمجلس إدارته نجح بجهازه الفني ، نجح بلعيبته، نجح بجون إدوارد، نجح بكل الناس.. بكل الناس، همسك حتة وأسيب حتة ده مش موجود في عالم كرة القدم وده على فكرة مش العدل، ده حال الكورة “.
وأختتم:” وفي الآخر ألف مبروك لنادي الزمالك يستاهل الحقيقة البطولة السنة دي، هاردلك للأهلي وبيراميدز ، وإن شاء الله بإذن الله يكون القادم أفضل”.
