شنَّ أحمد حسام “ميدو”، نجم نادي الزمالك السابق، هجوماً عنيفاً على مجلس إدارة القلعة البيضاء الحالي برئاسة الكابتن حسين لبيب بسبب الطريقة التي تُدار بها عملية رحيل المدير الفني المؤقت معتمد جمال. وانتقد ميدو الاعتماد على التسريبات الإعلامية للضغط على المدرب، مطالبًا بتقديره بالشكل الذي يليق بما قدمه للنادي في وقت عصيب..
وقال ميدو، خلال تصريحات تليفزيونية ببرنامج هنا” المونديال”، عبر قناة”النهار”: “كابتن معتمد جمال السنة اللي فاتت خد بطولة الدوري خسرنا الكونفدرالية في ماتش في ماتش الفاينال، وكابتن معتمد جمال عمل حاجات إيجابية كتيرة جداً واشتغل في ظل ظروف صعبة جداً”.
و أضاف:” وأنا رأيي إن المدرب اللي قدر أو قدرت أنت كنادي إن أنت تاخد منه 70% في ظل الظروف الصعبة ليه ما أديلوش الفرصة إنه يشتغل في ظروف أفضل؟يمكن أداؤه يكون أفضل أني أنا النهارده شغال معه مدرب وشايف إيجابيات بتكلم بقى مع الناس اللي شغالة مع كابتن معتمد بشكل مباشر “.
وشدد ميدو:” إدارة الكرة في النادي شوفت إيجابيات وشوفت سلبيات. زي أي مدرب عنده إيجابيات وسلبيات بس في النهاية معتمد جمال كان بيشتغل في ظروف غير عادية لعيبة ما بتاخدش مستحقات ا سكواد صعب جداً إن أنت تقدر تكسب بيه حاجه وفي نفس الوقت الراجل وصل نهائي الكونفدرالية وخد الدوري”.
وواصل:” وعنده سلبيات وعنده بعض الأخطاء فأنا النهارده قدام اتخاذ قرار يا إما أقول له شكراً بس لازم لو قلت له شكراً أقول له شكراً بأدب وبذوق وباحترام وبتقدير كبير جداً يستحقه واحد من أبناء الزمالك المخلصين “.
و أردف ميدو:” الكابتن معتمد جمال اللي أنا بعتبره إنه دخل تاريخ الزمالك من أوسع أبوابه بحصوله على بطولة الدوري الموسم الماضي ويستحق على المستوى الشخصي إنسان مهذب ابن بلد طيب زملكاوي أصيل استحمل ظروف صعبة صعبة جداً”.
و أشار:” وعلى المستوى الفني فهو مدير فني مميز جداً قدر إن هو يفوز لك ببطولة مهمة جداً في ظل ظروف صعبة جداً على أي مدرب حتى لو مدرب بيمتلك خبرات كبيرة جداً أكتر من معتمد جمال فالنهارده لازم إن أنت لو هتوجه الشكر لكابتن معتمد”.
وزاد ميدو:” لازم يكون التعامل بشكل أفضل مينفعش إن أنت ترمي تسريبات إن كابتن معتمد عنده عروض . وبعد كده هو يطلع يرد عليك يقول لك لا أنا عندي عروض بس أنا متمسك بالنادي ما ينفعش إن أنت ترمي في السوشيال ميديا وفي المواقع إن الكابتن معتمد جمال معروض عليه إن هو يشتغل مساعد للراجل الأجنبي وأنت عارف إن ده على الأرض وفي حقيقة الأمر عمره ما هيتحقق “.
و تابع:” نفسي الزمالك يعامل أولاده بشكل أفضل نفسي الزمالك يقدر أولاده بشكل أفضل لو قلت لكم أسماء كتيرة جداً عبر التاريخ خرجت إزاي من الزمالك وبكلمكم على ناس من ولاد النادي هتستعجبوا هتقولوا ليه إيه السبب إن الزمالك بيعمل كده؟”.
و استأتف ميدو:” الزمالك طبعاً ليه مواقف جيدة ومواقف إيجابية مع الكثير من أولاده عبر التاريخ ولكن أسماء كتيرة قوي خرجت من نادي الزمالك للأسف من الباب الصغير مش عشان هم غلطانين عشان الزمالك وإدارات الزمالك قررت إن هي ما تخرجهمش من الباب الكبير وده لازم يتغير “.
و أكمل:” ودي رسالتي وطلب مني للكابتن حسين لبيب أنا عارف إن هو بيحاول لكن لازم يبقى في مجهودات أكبر ولازم يبقى في تفكير في الصورة الكبيرة أنت بتوصل إيه للأجيال اللي جاية؟ الولاد الصغار والشباب الصغير اللي طالعة في النادي لما يجي النهارده يشوف إن واحد زي معتمد جمال بعد كل اللي عمله والظروف الصعبة اللي اشتغل فيها وفوزه ببطولة الدوري وإنه بيخرج من النادي بهذا الأسلوب وبالشكل ده “.
و استطرد ميدو:” اللعيب الصغير والمدرب الصغير يقول لك أنا أخدم النادي ليه؟ أنا بحب الزمالك آه بس سنة إذا كان الراجل ده بيعملوا معاه كذا وكذا وإذا كان فلان بيتعامل معاه كذا إيه اللي يخليني يبقى عندي اخلاص للمكان؟ “.
و أسهب:” أنت كرئيس نادي وكمجلس إدارة أنت اللي بتبني أو أنت اللي مسؤول عن اللوياليتي يعني الإخلاص كل من يعمل داخل النادي للكيان لنادي الزمالك ودي نقطة للأسف في نادي الزمالك والناس شغالة ما بتاخدش بالها منها يعني يقول لك إيه يعني ابن الزمالك جه اشتغل استحمل جه اشتغل ما فيش مشكلة وبتاع يخرج من النادي زي ما يخرج ما هو كده كده الراجل بتاعنا ما هو كده كده ابننا لا الأندية الكبيرة ما بتعملش كده لازم التعامل يبقى بشكل أفضل أنت خدت قرار والقرار بالنسبة لي واضح مش محتاج إن حد يكلمني يقول لي ولا أنا أكلم حد خلاص “.
وأكد ميدو:” معتمد جمال مش هيكمل في في الزمالك خلاص باينة في اتفاق مع مدير فني أجنبي والمدير الفني الأجنبي ده أنا بقول لكم في خلال أسبوع بالكتير هيرجع أو هيتم الإعلان عنه فأنت النهارده لازم تـمـيـك شـور وتتأكد إن معتمد جمال ده خارج من الباب الكبير خارج من النادي بالمشهد اللي يستحقه ما تقولش جوه مخك كده إيه يعني ما هو ابننا عادي هيزعل له شوية وإيه وهيرجع تاني في حضننا’.
وأختتم: “موقف ورا موقف ورا موقف ورا موقف تبتدي إن أنت إيه تخسر الحتة بتاع اللوياليتي اللي أنا بقول لك عليها الأندية الكبيرة ليها طرق أخرى للتعامل مع من خدمها حتى لو لم يكن من أولادها أو من أبنائها والله العظيم في أندية أنا لعبت فيها سنة أو سنتين يعني أياكس أمستردام دول تلاقيهم باعتين لي كده إيه إيميل لوحدهم ميدو في إيفينت كذا كذا”.
