شن الإعلامي أحمد حسام ميدو هجومًا حادًا على إدارة نادي الزمالك، كاشفاً عن رفض محكمة التحكيم الرياضي لاستئناف النادي ضد قرار إيقاف القيد، ومؤكداً ضرورة سداد مستحقات 11 قضية لتفادي تفاقم العقوبات.
وقال ميدو،خلال تصريحات تليفزيونية ببرنامج “هنا المونديال”،عبر قناة “النهار”:” المسؤولين في الزمالك ساعتها عن الكورة قال لك: لا لا أحسن يضرب وميدو الناس تقول ميدو بيفهم كورة، ميدو ما بيفهمش كورة يا عم! ميدو اللي لاعّب مرموش، ولاعّب هلال، ولاعّب عبد العاطي، ولاعّب مرعي، ولاعّب أحمد رضا بوبو، ولعّب باهر المحمدي ولعّب أحمد هاني، ولعّب يوسف أوباما، ولعّب مصطفى فتحي، ولعّب ياسر إبراهيم، ولعّب كل اللعيبة دي، إداهم الفرصة ولاعّبهم وآمن بيهم وبقوا من لعيبة كبار، ما بيفهمش كورة”.
وتابع: “ميدو اللي جاي يساعدك ببلاش، ما قالش حاجة خالص،.وأنا هشرح لحضراتكم إيه اللي بيحصل في نادي الزمالك دلوقتي، لأن برضه مسؤولي الزمالك لِـلأسف حاولوا إن هم يداروا على الموضوع وحاولوا إن هم ما يبقاش في شفافية مع الجمهور. وأنا قلت لمسؤولين الزمالك هنا في البرنامج إن لازم يبقى في شفافية”.
وشدد ميدو:” الجمهور اللي واقف جنبك بيساعدك، والكابتن حسين لبيب امبارح بيقول لك: أنا هحجب رقم واحد عشان ده الجمهور يستحقه ، ما حدش لعيب هيلبسه السنة الجاية، يستحق إن أنت تبقى صريح معاه. فالناس جوة نادي الزمالك لغاية دلوقتي بتقول إن إيقاف القيد -ولسه كانوا بيقولوا الكلام ده قبل ما يطلع القرار- إن لا هيتِـشال، إن هنقدر إن إحنا نحل مشكلة القيد دلوقتي .النهارده تم رفض طلب الاستئناف المستعجل اللي الزمالك كان طالبه على قرار إيقاف القيد لفترتين تأديبيًا، خلاص دي منتهية”.
وواصل:” لسه بقى المحكمة الرياضية هتحدد تاريخ بالطعن وتشوف. وأنا قلت لكم فرصة إن الزمالك ينجح في إن هو الاستئناف بتاعه يتقبل لا تتعدى 5%، كل اللي الزمالك بيعمله دلوقتي إنه لازم يخلص القضايا اللي وصلت له، والتسويات لازم يعملها لكل القضايا اللي وصلت له قبل يوم 31/3، وأنا قلت لحضراتكم الكلام ده، الزمالك لغاية 31/3 كان عليه 14 قضية، هو حل منهم دلوقتي تلاتة اللي هم مساعدين جوميز ، نزلت قضية صلاح مصدق مرة تانية بقوا 11 قضية “.
و أردف ميدو:” لازم الزمالك يدفعهم.إمتى؟ قبل يوم 30/6. طيب، لو يوم 30/6 جه والزمالك لسه ما سواش أو سدد، من حق الزمالك إنه يطلب مدأو يبقى في مد استثنائي ليوم 25/7، دي الصياغة الصح اللي أنا بقولها مش زي ما الناس بتقول إن “ما تم المد لـ 25/7″؛ لا، التاريخ لـ 30/6، يوم 30/6 الزمالك يقول: أنا لسه ما خلصتش يروح الاتحاد الإفريقي قايل له: أنا بمد لك، أنت دلوقتي عملت طلب إن أنت تمد وبتحل أنا همد لك ليوم 25/7. ده لأي نادي مش للزمالك بس”
و أكمل: “فالزمالك دلوقتي بيحارب إنه يخلص بقى الـ 11 قضية اللي أمام حضراتكم دي قبل يوم 25/7: جوميز 1200 دولار، جروس 133 ألف دولار، فرجاني ساسي 555 ألف دولار، دي القضايا اللي الزمالك لازم يخلصها. نادي إستريلا اللي هو النادي بتاع شيكو بانزا 200 ألف يورو، نادي شارلروا البلجيكي اللي هو عدي الدباغ 170 ألف يورو، دي القضايا يا جماعة اللي وصلت قبل يوم 31 مارس”.
وزاد ميدو:” نادي نهضة الزمامرة المغربي 250 ألف دولار نادي ألكسندريا الأوكراني، نادي بزيرا 800 ألف دولار. وابراهيم نداي، ابراهيم نداي، ابراهيم نداي مسؤول الزمالك كانوا اتفقوا معاه إن هم يدوا له 300 ألف دولار دلوقتي، والراجل كان موافق إن هو يعمل تسوية، ثم تم تجاهله كما تم تجاهل جميع اللعيبة اللي قدام حضراتكم دي ولو تفتكروا الكلام ده لما حصل، وأنا دايماً لما بيحصل حاجة كويسة بشيد بيها، ولما حاجة بتحصل غلط بتضر النادي بقولها”.
واستطرد:” قلت لكم إن عملية وقرار تجاهل اللعيبة اللي بتنذرك إن هي بتفسخ عقودها جريمة كروية، جريمة رياضية النهارده نادي الزمالك بيدفع ثمنها، وما حدش من مسؤولين الزمالك يزعل مني. النهارده لما أكون عندي اختيار إن أنا أدي الفلوس للعيبة اللي بتلعب معايا ، وأروح واخد الفلوس مديها لك كلها عشان تجيب لي الدوري، وأخش الموسم اللي بعديه دوري أبطال إفريقيا من غير ما أعرف أجيب لعيبة، والرقم اللي قد كده يبقى أضعاف الأضعاف؛ يبقى أنا قراري كان غلط”.
و استانف: “في لعيبة كان ليها 400 و 500 ألف دولار تخلص قصتها، كنت تدي له 200 وتقسط وتسكته إنما تتجاهله ما تردش عليه! المحاميين والوكلاء بتوع اللعيبة دول كلهم يقولوا لك: إحنا خلاص ناقص تلات أربع أيام وهنفسخ، هتروح في داهية، وتقول له: افسخ افسخ وبعد كده نحل! طب ما إيه الحل يا جماعة؟الحل إن أنت لعيب جه لعب عندك تلات شهور، تلات شهور، وبتدفع له عقد تلات سنين، وبتدفع فلوس نادي وبتخسر القيمة التسويقية بتاعة اللعيب في حين إن أنت لو كنت اديته 10% من فلوسه وسويت معاه، عندك فرصة إن أنت تقدر تبيعه حتى لو أنت مش عايزه فنياً”
واردف:” الراجل صلاح مصدق ده، صلاح مصدق لعيب جه الزمالك بـ 300 ألف دولار وبياخد 150 ألف دولار في السنة، تاني سنة 200 بتاع.. كلها أرقام صغيرة. الراجل جه من أول مباراة قدام النادي الأهلي نجم الماتش ولعب كويس جداً جداً. مع أول غلطة عملها -كورة بالعرض ما طلعش فيها كويسة- اللجان الإلكترونية ذبحته، ذبحته ليه؟ عارفين ليه؟ عشان ميدو اللي جايبه! زي باهر المحمدي لما جبته نادي الزمالك بـ 250 ألف جنيه وما دخلوهوش السكور شيت ولا ماتش عشان ميدو اللي جايبه، جبته إعارة ست شهور بأوبشن تو باي (Option to buy) مليون جنيه”
و أسهب: “المسؤولين في الزمالك ساعتها عن الكورة قال لك: لا لا أحسن يضرب وميدو الناس تقول ده ميدو بيفهم كورة ميدو ما بيفهمش كورة يا عم! ميدو اللي لاعّب مرموش، ولاعّب هلال، ولاعّب عبد العاطي، ولاعّب مرعي، ولاعّب أحمد رضا بوبو، ولاعّب باهر المحمدي ولاعّب أحمد هاني، ولاعّب يوسف أوباما، ولاعّب مصطفى فتحي، ولاعّب ياسر إبراهيم، ولاعّب كل اللعيبة دي، إداهم الفرصة ولاعّبهم وآمن بيهم وبقوا من لعيبة كبار، ما بيفهمش كورة! ميدو اللي جاي يساعدك ببلاش، ما قالش حاجة خالص.مع أول غلطة صلاح مصدق اللجان الإلكترونية ذبحته”
واختتم: “الراجل جاله عرض من الوداد رسمي وأنت مش عايزه فنياً، مش عايزه مش عايزه مش مقتنع بيه ، يا عم ميدو اللي جابه وحش، صح؟ اقبل العرض، مش ترفض العرض وما تردش عليه. صلاح مصدق جاله عرض رسمي من الوداد إعارة بأوبشن تو باي قبل كأس العالم للأندية بتلات أيام، تم تجاهله الراجل قعد معاك يا جماعة بيقول لكم إن الراجل يا جماعة.. الراجل أنا عملت لكم إنذار هفسخ العقد. المستشارين القانونيين بتوع نادي الزمالك حطوا له فلوس في الأكونت بتاعه،حسبتها غلط عشان الناس مش متمرسين، وده اللي إحنا حذرنا منه. الراجل النهارده كان سبب في إن أنت مش عارف تجيب لعيبة، مين اللي هيحاسب الكلام ده على الزمالك؟ مين؟ قولوا لنا، قولوا لنا مين”.
