وجه أحمد حسام “ميدو”، نجم الزمالك السابق، انتقادات حادة للطريقة التي تدار بها الأمور داخل القلعة البيضاء مؤخرًا، معتبرًا أن ما يمر به النادي حاليًا يتجاوز مجرد كونه أزمة نتائج، ليصل إلى مرحلة “الكارثة الإدارية”.
وقال ميدو،خلال تصريحات تليفزيونية عبر قناة” النهار”: “نادي الزمالك عايز طول عمره في أكشن وافلام ومشاكل وللأسف في بعض الأوقات بقيت بحس أن جمهور الزمالك مش مكتوب ليه يفرح أوقات طويله، الزمالك قبل بدايه الموسم عمل هيكلة كبيرة في قطاع كرة القدم”
واردف: “إحنا كان هدفنا أن حد يجيي يبقى شغله تنفيذي فني ويبقى متفرغ ودي تبقى صنعته وعلشان كده رشحنا جون إدوارد”.
وتابع ميدو:” لكن في ناس جوا نادي الزمالك أصرت أن ملف الكرة كله شاملة الفنية والمالية وكل حاجه وكل شئ يتسلم لجون إدوارد وده أثر عليه جدا “.
و أضاف:” الناس اللي كانت ماسكة الشغلانه في نادي الزمالك كلها مشيت والناس دي حتى في الإدارة المالية والقانونية قالوا يا جماعة احنا عندنا استعدادا نكمل 6 شهور بدون أجر بس علشان اللي يستلم الحاجات دي يبقى فاهم بيعمل ايه”.
و أكمل ميدو:” لكن ده متمش وكل حاجه اتغيرت واتسلمت لجون إدوارد والناس في الزمالك أصرت تسلم كل حاجه ”
وزاد:” اتسلم كل حاجه والناس قالوا لو محتاجين حاجه احنا موجودين .. لكن ده اترتب عليه ايه؟ أن إحنا في كارثة حاليا الزمالك في كارثة، أنا بقعد اتلكك لاي حاجه تحصل في نادي الزمالك لو صغيره اكبرها علشان أسند الناس، لكن في وقت من الأوقات لأ.. الزمالك عندي أهم”.
و أشار ميدو:” لازم الموقف يبقى واضح ليكم .. المسؤولين عن إدارة كرة القدم الحالية في نادي الزمالك اختاروا يكذبوا على جمهورهم اللي ساندهم من اول يوم شغل ليهم في مباراة سيراميكا كليوباترا في الإسماعيلية وانا كنت فيها “.
وتساءل:” في حد ببكذب على ولاده ويضحك على اخواته .. هو ايه مبدأ العائلة.. أنت لما تكدب وفي منصة رسمية للنادي ده يعمل فجوة كبيرة، أنا أفهم انك ممكن في وقت تخبي حاجات متتكلمش فيها .. لكن تكدب في حاجه او تقول حاجات غلط دي كارثه “.
و أسهب ميدو:” الزمالك خد عقوبة إيقاف قيد فترتين لأن في تراكم قضايا اخر 6 شهور وكلهم حصل فيهم تجاهل في التواصل معاهم ولا حد رد عليهم ولا حاول يحل .. دي اسمها جريمة كروية”.
وأتم: “اوعى حد يطلع يقول إن علشان مفيش فلوس .. لا الزمالك طول عمره مفهوش فلوس … أنت اصلا محاولتش ترد على الناس ولا تتكلم معاهم، القواضي بدل ما كانت ارقام بسيطة بقت ارقام فلكية وفيها فوائد والموضوع كبر مبقاش لازم اسددله بقى.. ده انا لازم اسدد ليه ولغيره بأرقام مضاعفة وغرامات وبقى فيها عقوبات”.
