أشاد الكابتن أيمن يونس بالمدير الفني للزمالك معتمد جمال، واصفاً إياه بأنه أفضل مدرب مصري في الموسم الماضي، وانتقد يونس بشدة قرار الإدارة بالتخلي عنه والبحث عن مدرب أجنبي بعد أن نجح في قيادة الفريق في وقت حرج، وعرف كل أسرار وتفاصيل اللاعبين
وقال يونس، خلال تصريحات تليفزيونية ببرنامج “من القاهرة”، عبر قناة “أون سبورت ماكس”:” أنا كتبت حتى تويتة استعجاب قوي، يعني لما تجيب معتمد جمال وبعدين يقول لك لا بتدور على مدير فني أجنبي، تجيب معتمد جمال وما تقوليش جون إدوارد هو اللي عايز، مش معتمد جمال هو اللي كان عايز مدرب أجنبي إحنا مالناش دعوة”.
و تابع: “أنت جبت معتمد جمال في وقت صعب جداً، معتمد جمال أحسن مدرب مصري الموسم اللي فات، اللي يقول غير كده يبقى بيهزر، في ظل إن الأوراق اللي معاه والظروف اللي معاه، معتمد جمال نجح نجاح باهر، فمعتمد ياخد أحسن مدرب بلا منازع في الموسم اللي فات”.
وشدد يونس:” فتيجي بعد ما معتمد عارف أسرار الفرقة وإمكانيات الفرقة وإمكانيات اللعيبة وشخصيات اللعيبة وقدراتهم الجماعية وقدراتهم الفردية تقول له مع السلامة؟ يعني قعد سنة بيتعلم فيك وبيتعلم معاك ورغم كده كسب، تيجي بعد ما عرف أسرار البيت ده تقول له لا استنى هنجيب واحد تاني يتعلم تاني من أول وجديد؟ إيه يا جماعة ده؟ “.
وأكمل:” طب أنت جايبه ليه؟ أنت ماكنتش جايبه عن اقتناع بقى ومشي كلام كوميدي قوي، وقعدته في البيت قاعد مستني؟ هنهزر! آه أنت يا راجل بطل في ظل كل اللعيبة دي اللي نصهم.. كان كتير قوي منهم لا يصلح لنادي الزمالك، وقدرت تكسب وتحقق، أنت تكمل، أنت بطل وتكمل وكان لازم يبقى واضح ومن بدري. والنتيجة؟ “.
و أردف يونس:” النتيجة دي ليها مقابل، التأخير الكتير قوي في فترة الإعداد هتشوف المقابل بتاعه، هيبقى له مقابل، لأن الإعداد البدني والإعداد النفسي والإعداد الخططي كل ده بيحتاج وقت بالذات قبل بداية الموسم.”.
