كشف الإعلامي أمير هشام، أن النادي الأهلي تلقى بالفعل عرضاً رسمياً من نادي كونيا سبور التركي للتعاقد مع اللاعب، موضحاً أن إدارة الأحمر كانت قد تدرس قبول العرض حال وصول المقابل المادي إلى 7 أو 8 ملايين دولار، وبتوقيت يتناسب مع فترة القيد، إلا أن غلق باب القيد جعل فكرة رحيل اللاعب “تكاد تكون مستحيلة” في الوقت الحالي.
وقال هشام، خلال تصريحات تليفزيونية عبر برنامج “مودرن سبورتس”:” قصة إمام عاشور إيه؟ بمنتهى البساطة لأن الكلام كتير قوي على إمام على مدار الفترة اللي فاتت، وإمام قاعد في الأهلي، هل فيه عروض ولا مفيش عروض؟ آه، طبعًا فيه عرض من كونيا سبور”.
وتابع:” الأهلي إمبارح طلع بيان رسمي أعلن من خلاله إنه رفض أي عرض، وإن إمام مكمل مع النادي الأهلي، وبالمناسبة، الأهلي كان ممكن يوافق على عرض كونيا لو كان وصل لـ7 أو 8 مليون دولار، ولو كان قبل غلق باب القيد كان ممكن يتباع ويمشي”.
و أردف هشام:” لكن خلي بالك، بما إن باب القيد قفل، فإمام فرصة خروجه من النادي الأهلي تكاد تكون مستحيلة حاليا، وأنا بقول لحضرتك معلومة، وبقول لحضرتك أخبار، وأنا بتكلم على الفترة دي تحديدًا ولحد نهاية الموسم. بعد الموسم ده هيكون إمام ناقص له سنة في عقده”.
وشدد: “وطبعًا منعرفش من النهارده لبكرة ممكن يحصل إيه، ممكن تلاقي إمام يجدد، ممكن ميجددش، ممكن يكمل كده، لكن فكرة رحيله مش مطروحة داخل النادي الأهلي، ولن تُطرح بالمرّة”.
و أردف هشام:” إمام رغبته الأولى هي البقاء والاستمرار مع النادي الأهلي، ودي الرغبة المؤكدة اللي بلغ بيها المسؤولين في النادي الأهلي، بس حط في نفس الإطار ده إن العلاقة ما بين المسؤولين في النادي الأهلي وإمام عاشور مش أفضل حاجة، وبرضه عشان أكون منطقي وواضح مع حضراتكم، العلاقة مش مستقرة”.
وزاد:” لأن في بعض الأوقات تلاقي إمام يقولك: أنا عايز عقد أكبر.. الأهلي عرض عليه 25 مليون و10 بونص، يعني 35 مليون، غير بند الإعلانات، اللاعب ياخدوا كله، الأهلي ممكن يكون ليه نسبة بسيطة في بند الإعلانات، وممكن الأهلي يكون منفتح لفكرة إنه ياخد الإعلانات كلها من غير ما الأهلي ياخد أي نسبة”.
و أكمل هشام:” ودي بقى تمييز نوعًا ما أو إضافة من النادي الأهلي لإمام عاشور، دي التفاصيل اللي بيتم الحديث عنها داخل النادي الأهلي، أما بخصوص اللاعب نفسه، فهو بيطمح في أرقام كبيرة، والأهلي لن يستجيب ليها”.
وأختتم: “وأنا بقول لحضراتكم، ده لمصدر داخل النادي الأهلي، ودي المعلومات اللي عندنا”.
