“” فاتورة الجمهور تُدفع فوراً”.. أيمن يونس يوضح سر قوة الزمالك في صراع الدوري ورؤيته للموسم الجديد

أوضح أيمن يونس،نجم الزمالك السايق أن الأبيض يظل دائماً مرشحاً بارزاً ومنافساً أساسياً على لقب الدوري ضمن الأربعة الكبار مهما كانت ظروفه.

وأشار إلى أن “تيشيرت الزمالك” والقوة الجماهيرية يمنحان اللاعبين تحولاً إيجابياً كبيراً، ضارباً المثل بالنجم عبد الله السعيد الذي يتألق كأحد أفضل لاعبي الموسم رغم وصوله لسن الـ 41 عاماً بفضل الدوافع الجماهيرية.

وقال يونس،خلال تصريحات متلفزة عبر قناة “أون سبورت ماكس”، ردا على سؤال:” الزمالك الموسم الماضي في بداياته أو ما قبل الموسم الماضي كان الجميع أو المعظم يتحدث إنه الزمالك مش هيقدر يعمل حاجة في الموسم ده، وفي النهاية الزمالك خد الدوري ووصل نهائي الكونفدرالية. هذا الاستثناء أو هذه البطولة؟: “مين اللي قال كده؟ ناس كتير.. أنت عايز مجتمع ملون؟”

ومن جانبه قال الإعلامي كريم رمزي: “طب أقول لك بالمناسبة يا كابتن، لا مش مجتمع ملون، طب أقول لك حاجة صريحة جداً، ما إحنا بنتكلم على الورق، الزمالك زي ما حضرتك قلت أهلي، بيراميدز داخل أجهز منه الموسم الماضي، فأنا لما أطلع أقول يا جماعة الزمالك في الترتيب رقم تلاتة على الورق، فده كلام منطقي وطبيعي طبقاً للي موجود على الورق، الزمالك السنة اللي فاتت عمل…”

ليرد يونس: “لا، أنت بتقول من التلاتة المنافسين مش بتقول التالت مثلاً، لا بتفرق قوي في المعنى.”

و يتدخل رمزي محددا: “التالت في الترتيب لا…” ليجيب يونس: “من التلاتة، ليه بقى؟ ليه؟ لأن القوة الجماهيرية لنادي الزمالك بتدي فوارق طبعاً، بعض اللعيبة مش كلهم لما بيلبسوا تيشيرت الزمالك بيجيلهم تحول إيجابي، يعني بيبانوا في، يعني أنت لما تلاقي واحد عنده 41 سنة نجم الموسم، ما هو ده تيشيرت الزمالك! هو عبد الله السعيد لو بيلعب في نادي تاني كان هيبقى عنده الطاقة دي؟ كان هيبقى عنده رغبة الاستمرار؟ لو بيلعب في أي نادي تاني مافيهوش شعبية؟ لكن هو عارف إن الحساب بتاعه الفاتورة بتتدفع على طول”..

وواصل:” لاعب كويس الجماهير بتصوت له، الفاتورة خلي بالك الأندية الجماهيرية الفاتورة بتاعتها بقت على طول بعد 90 دقيقة مافيهاش رحمة. وبناءً عليه، الزمالك داخل الموسم ده وأنت مطمن عليه من تلاتة لأربعة المنافسين، من تلاتة لأربعة المنافسين، أياً كانت الظروف، مهما كانت الظروف من التلاتة أربعة المنافسين، أياً كان مين يوصل فيهم دي عايزة بقى شيء من الاستقرار وشيء من الهدوء وشيء من التوفيق وشيء من رغبة اللعيبة”.

وأكمل يونس:” كل ده هتصنعه إزاي؟ يعني أنا مثلاً مدير كورة في نادي الزمالك عليه دور كبير قوي، دايماً مدير الكورة مش توقيته على البنش وهو قاعد برة، أستاذ عبد الناصر محمد طبعاً راجل محترم قوي بس دايماً لازم يكون قارئ، بس هو نفسه هل كان فاهم هيكمل مش هيكمل؟ لأن المشاكل اللي حصلت فور انتهاء الدوري كانت عايزة مدير الكورة قاعد”.

وأشار: “كل ده يعني لازم تخش تعرف عقلية هتتعامل معاها إزاي، عقلية شيكوبانزا هتتعامل معاها إزاي، عبد الله السعيد إزاي تديله دوافع، لا يا عبد الله ده أنت نجم الموسم، ده أنت الموسم الجاي بقى هتعمل كده، فأنت إزاي ده؟ مدير كورة قبل ما يبقى مدير فني طبعاً، لكن أنت عشان برضه أنا معرفش بس الحوار بين عبد الناصر قالوا له كمل ولا مش هتكمل؟ لو قالوا له كمل وده النتيجة لا يبقى هو غلطان”.

وأتم:” لو قالوا له ما تكملش وهو يعني قعد في البيت وحصلت الحاجات دي يبقى هو الراجل لا يلام، مفهوم يعني لازم نكون حقانيين برضه معاه هو راجل قيمة يعني عظيمة.”.