أبدى الكابتن خالد جلال، المدير الفني لفريق غزل المحلة، رضاه التام عن الأداء الكبير الذي قدمه فريقه أمام الزمالك، رغم عدم تحقيق الفوز، مؤكدًا أن النتيجة لم تكن منصفة مقارنة بعدد الفرص المحققة التي أهدرها لاعبو الفريق طوال اللقاء.
وقال جلال، بعد مباراة الزمالك:” أنا توليت المهمة من 4 أيام، والحقيقة كنت مركز جدًا في الأربعة أيام إزاي إن إحنا هنقابل فريق زي الزمالك، بجماهيره، فريق كبير طبعًا”.
وتابع:” من أول يوم أنا جيت فيه قلت لهم: «إحنا بنلعب على الفوز؛ لأن 3 نقاط مهمة جدًا، أي مباراة على ملعبنا إحنا بنلعب من أجل الفوز فقط»، والنهارده بان ده في الأداء بتاعنا”.
وشدد جلال:” الحقيقة الزمالك استحوذ، ولكن إحنا كان عندنا هدف كبير إن إحنا نلعب في المساحات اللي هي.. وهو بيهاجم، المساحات اللي ورا الباكين، وبين الباك والسيرد باك”.
و أضاف:” في الحقيقة وصلنا كتير قوي، وأنا مستغرب من حاجة.. من الإصابات! إصابات كثيرة جدًا، أنا غيرت 5 لعيبة، أنا في حياتي.. قلت لهم: «أنا من أول ما بدأت التدريب، أول مرة في حياتي 4 إصابات، لكن إحنا النهارده عبده يحيى لوحده.. يعني مش هقول لك 3 فرص، 3 انفرادات!”.
و أردف:” سعيد، رشاد.. يعني لو أقول لك إحنا النهارده لو الماتش نتيجة منصفة، ما نجيبش أقل من 3 أجوال! أقل من 3 أجوال ما ينفعش!، أنا قلت لهم حاجة ما بين الشوطين، قلت لهم: «خلوا بالكم إحنا بنضيّع، واللي بيضيّع ممكن يستقبل؛ لأن الزمالك فريق كبير”.
و اشار جلال:” وعلى فكرة أنا قلتها من قبل الماتش، قلت لهم: «خلوا بالكم، ماتشات اللي هي كده، زمالك، أهلي، بيراميدز، لازم الفرصة اللي تيجي، ده إحنا 5.. 6.. أنا ما بقولش فرصة، هما نادي الزمالك.. جت ليهن فرصة ضربة جزاء، خلاص جول! وأنا قايل لهم كده اللعيبه قبل الماتش نخلي بالنا، فطبعًا في سوء.. أقول لك إيه.. يعني في إهدار للفرص بصورة غريبة وعجيبة النهارده!”.
وأختتم:” كنت أتمنى إن أنا.. طبعًا المهندس وليد والأستاذ أحمد بدوي والناس، والجمهور المحلاوي الكبير اللي جه ورا الفرقة حقيقي، إحنا عملنا مباراة كبيرة ولكن النتيجة عكس بصراحة الفرص والأداء… ربنا يكرم في اللي جاي”.
