تحدث شريف إكرامي، حارس مرمى الأهلي السابق، عن الجدل الدائر حول مركز حراسة المرمى داخل الفريق، مؤكدًا أن المنافسة بين الحراس أمر طبيعي، لكن انتقال الراية من جيل إلى آخر يجب ألا تحيط به صراعات خارج الملعب.
وقال إكرامي عبر منصة «إكس»: «بعيدًا بقى عن مين قال إيه ومين رد على مين.. في سؤال محتاجين نقف عنده.. اللي بيحصل ده انعكاسه إيه على مركز حراسة المرمى في الأهلي؟»
وأضاف: «طبيعي جدًا في الكورة يبقى فيه منافسة، وطبيعي في وقت ما يحصل تسليم للراية من جيل لجيل.. لكن مش طبيعي إن التسليم نفسه يبقى محاط بكل الصراع ده».
وتساءل إكرامي عن تأثير دخول أسماء الحارسين في صراعات خارج الملعب، قائلًا: «وإيه اللي بيحصل لما أسماء الحارسين نفسهم تتحول لأدوات في صراعات بره الملعب؟ إعلام، خلافات، رسائل، حسابات شخصية.. ساعتها هل المنافسة هتفضل جوه الملعب بس؟»
وأوضح أن الأجواء المحيطة بالمركز قد تجعل كل تفاصيل المنافسة محلًا لتفسيرات تتجاوز الجانب الفني، مضيفًا: «ولا كل صدة، كل غلطة، وكل مشاركة هتبدأ تتشاف بأبعاد أكبر من الكورة؟»
وطرح حارس الأهلي السابق تساؤلًا بشأن مستقبل مركز حراسة المرمى داخل الفريق، قائلًا: «على المدى البعيد هل ده هيساعد الأهلي يعمل انتقال طبيعي في واحد من أهم المراكز في الملعب؟ ولا هيضر شكل الانتقال نفسه؟»
واختتم إكرامي رسالته بالتأكيد على أن القضية الأهم لا تتعلق باسم الحارس الذي سيحرس مرمى الأهلي، وإنما بمصلحة الفريق، قائلًا: «في النهاية، مش السؤال مين هيبقى حارس الأهلي.. لكن وسط المنافسة والصراعات والرسائل اللي بتحصل بره الملعب.. السؤال الأهم مصلحة الأهلي والمركز نفسه، فين في كل ده؟»
