إمام عاشور يطلب.. والأهلي يرفض: كواليس مثيرة في ملف تعديل عقده والتعامل مع وكيله- فيديو

كشف الإعلامي إبراهيم عبد الجواد عن كواليس “شائكة” تدور داخل أروقة النادي الأهلي، تتعلق بمستقبل لاعب الفريق إمام عاشور ومطالبه المالية لتعديل عقده، مؤكداً وجود حالة من الحزم الإداري تجاه اللاعب ووكيله.
​
وقال عبد الجواد، خلال تصريحات تليفزيونية ببرنامج “ملعب أون”، عبر قناة “أون سبورت”:” بردود الأفعال الرسمية من النادي الأهلي على تصريحات الأستاذ أدم وطني وكيل اللاعب إمام عاشور، توجهنا إلى النادي الأهلي لمعرفة رد الفعل الرسمي -حط تحت كلمة الرسمي دي 60 مليون خط- على تصريحات الأستاذ أدم وطني بالأمس فكان الرد كالتالي”.

و أضاف: “النادي الأهلي ليس لديه أي نية لبيع أو التفريط في إمام عاشور، رغبة النادي الأهلي هي الإبقاء على إمام عاشور مع تعديل عقده كما تم الاتفاق معه من قبل”.

وأكمل عبد الجواد:” إنه في هذه اللحظة الأولوية لدى النادي الأهلي هي إنهاء تجديد التعاقد مع اللاعبين التي تنتهي عقودهم بنهاية الموسم الحالي، وهما حسين الشحات وأحمد نبيل كوكا، بعد كده يدخل بقى عندنا مصطفى شوبير، يدخل عندنا محمد عبد الله الناشئ وبعد كده يجي تعديل عقد أي لاعب تاني سواء إمام عاشور أو غيره”

​ وواصل: “النادي الأهلي -ودي تصريحات رسمية- النادي الأهلي وإدارة النادي الأهلي لن تتعامل مع الأستاذ أدم وطني فيما يخص إمام عاشور أو يخص أي لاعب آخر داخل النادي الأهلي”.

و أشار عبد الجواد :” النادي الأهلي استفسر من الاتحاد المصري لكرة القدم عن الأستاذ أدم وطني وما قيل له -ده طبعاً على عهدة المسؤولين أو المصدر الرسمي داخل النادي الأهلي- إن ما ورد إليهم من الاتحاد المصري لكرة القدم إنه ليس له أي صفة.. يعني ليس له أي صفة كوكيل لاعبين، وإن الاتحاد لم يتعامل معه من قبل كوكيل للاعبين في أي صفقات من قبل، طبعاً ده على عهدة المسؤولين في النادي الأهلي”.
​
و تابع: “طيب ليه هيتم إرجاء القصة دلوقتي؟ زي ما قلتلك لسببين: نمرة واحد عشان في أولويات تانية عند إدارة الكرة وتحديداً الكابتن سيد عبد الحفيظ منها تجديد عقود اللاعبين اللي عقودهم بتنتهي السنة دي زي شوبير وكوكا وهكذا”.

​ وشدد:” الحاجة التانية إنه إمام عاشور بعد نهاية كأس العالم للأندية توجه إليه الكابتن محمد يوسف عشان يقعد معاه يعدله عقده، فكان رد إمام عاشور في التمرين -يعني مش في جلسة ولا قاعدة ولا أي حاجة في التمرين على هامش التمرين- باللفظ كده اللي اتقال لنا: ‘يا كابتن أنا عايز أكون أعلى لعيب في الفرقة، أعلى عقد في الفرقة، وساعتها ما حصلتش أي قاعدة”.

وزاد عبد الجواد:” صدر بعديها بعد كده التصريحات من الأستاذ أدم وطني اللي هي التصريحات اللي كانت سلبية تجاه الكابتن محمد يوسف، واللي على إثرها إدارة النادي الأهلي قالت إنها مش هتتعامل معاه تاني وما زال هذا القرار سارياً حتى هذه اللحظة وبالتالي هي دي القصة، فساعتها إمام عاشور مارضيش يقعد عشان يتناقش في تعديل عقده، وبالتالي إحنا دلوقتي إمام عايز يقعد فحيقعد وفقاً لجدولنا وفقاً لأولوياتنا مش وفقاً لرغبة أو رؤية إمام إنه عايز يقعد دلوقتي دي قصة الأهلي”.
​
واستطرد:” قصة إمام عاشور نفسه، إمام عاشور نفسه اللي ورد إلينا من مصدر مقرب من اللاعب وتاكدنا من صحة هذه المعلومة من أحد الأطراف داخل النادي الأهلي، إنه إمام عاشور خلال الـ 10 أيام اللي فاتوا تواصل مع أحد الوسطاء لجس النبض مع مسؤولي الأهلي لتحديد موعد لإجراء جلسة خلال الفترة الحالية من أجل مناقشة تعديل عقد إمام عاشور”.

وأتم:” خلال الـ 10 أيام اللي فاتوا في وسيط اتكلم مع إمام عاشور ونقل الصورة لمجلس إدارة الأهلي إن إمام عايز يقعد عشان يتكلم معاكم في تعديل عقده، فكان الرد عليه زي الرد اللي إحنا قلناه لحضراتكم إنه ما عندناش أي مشكلة إحنا مرحبين بس هنقعد في الوقت المناسب لينا، والوقت المناسب لينا هو مش دلوقتي خالص”.

شاهد: