كشف محمد مجاهد، رئيس لجنة الشباب والرياضة بمجلس النواب، عن تفاصيل ماليه هامة تخص فرع الزمالك الجديد باكتوبر وقيمة الأرض الجديدة.
ووجه الرئيس عبد الفتاح السيسي بتخصيص قطعة أرض جديدة لنادي الزمالك في مدينة السادس من أكتوبر، وذلك بعد سحب الأرض السابقة.
وقال مجاهد، في تصريحات تليفزيونية ببرنامج “الحكاية”، على قناة “ام بي سي مصر”:” التصميم النهائي هيكون متاح خلال شهرين،احنا مسبناش نادي الزمالك لوحده في التفاوض وفي الترتيبات كلها، كل أجهزة الدولة اشتركت زي ما قال الكابتن حسين؛ وزارة الشباب والرياضة اشتركت، لجنة الشباب والرياضة (بمجلس النواب) اشتركت وتعبت جداً في الموضوع، وزارة الإسكان اشتركت وقدمت عروض محترمة وكان في تفاوض جامد جداً مع الوزارة والناس قبلوا بعض التفاوض” .
و أضاف:” كل ده كان برعاية سيادة الرئيس، هو اللي أدى الإشارة وأدانا وطمنا اللي احنا ندوس ونشتغل، ولازم نبقى عند حسن ظن الرئيس، إنه يبقى في مشروع استثماري سليم. أنا عندي النهارده أكتر من ثلاث أربع شركات جاهزين وموافقين على الشروط بتاعتنا اللي كلنا اتفقنا عليها”.
و أردف مجاهد: “أنا عندي ثلاث أربع شركات كبيرة جداً وشركات مصنفة وتم فحصها تفصيلياً موافقة على الشروط، موافقة على البزنس موديل ده وموافقة على كل حاجة ومستنية ومقدمين ورقهم وبيتفحصوا، في خلال أسابيع هيتم إنهاء الإجراءات القانونية لأن إنت عندك احنا دولة وإنت بتشتغل مناقصات وفي قانون بتمشي عليه”.
وواصل:” فالشركات دول إن شاء الله محترمين هننقي منهم واحدة اللي هتقبل، ففي ثلاث شركات جاهزين يخشوا يستثمروا ويضخوا أموال، وأنا بطمن الكابتن حسين وموافقين على شروط دفعة مقدمة لنادي الزمالك”.
وأكد :” 25% يعني 377 مليون (يعني الأرض دي بمليار وحاجة، بمليار و500 وكسور تمام)، الدفعة المقررة فيها 377 مليون. لجنة الشباب اتفاوضت ووزير الشباب والرياضة وضغطنا واتفاوضنا مع وزارة الإسكان نزلنا الدفعة المقدمة دي لـ 15% عظيم، يعني 226 مليون، احنا وفرنا لنادي الزمالك 150 مليون في الدفعة المقدمة”
زاد مجاهد:” هو النهارده كان دافع مبالغ في الأرض القديمة مظبوط؟ تم أخذ موافقة على تحويلها للدفعة المقدمة من الأرض الجديدة، هديلك حاجة ثالثة أحسن من كل ده، إنت الأرض بنيت فيها وعملت إنشاءات وعملت أسوار مظبوط الكلام ده؟ اتفقنا مع وزارة الإسكان على تقديره وتقدير قيمته ويتحسب بقيمة عادلة وهيتضاف للأرض الجديدة من الدفعة المقدمة”.
و استطرد: “إنت النهارده أنا بعلن اهو برضه تاني؛ نادي الزمالك لن يتحمل جنيه واحد تكلفة في المشروع، المشروع ده تكلفته 5 مليار و300 مليون وإنت وأنا هقولك اهو مش هيدفع جنيه، مش هيدفع فيها جنيه وأنا مسؤول عن كلامي”.
وشدد مجاهد:” المشروع ده التجاري بتاعه المقايسة بتاعته التقديرية اللي الاستشاري عاملها 2 مليار و500 مليون تكلفته، النادي مش هيدفع فيه ولا جنيه، طب النادي نفسه اللي هو 85% المساحة بتاعة الأرض هيتكلف كام؟ هيتكلف 2 مليار و800 مليون، نادي الزمالك لن يتحمل فيه شيء هو كابتن حسين بيخاف يتكلم بس في موضوع الفلوس”.
ووجه حديثه لحسين لبيب قائلا: “يا كابتن حسين إنت عايز تحل مشاكلك القديمة من الأرض الجديدة؟ ما تخلي الأرض الجديدة دي تبقى في تنمية عندك مالية مستدامة تصرف بيها على النادي”.
و أستانف:” طب احنا جايبين استثناء لأول قسط ست شهور تاني، ست شهور سماح من بعد استخراج الرخص، ولا وزارة الشباب ولا لجنة الشباب والرياضة في مجلس النواب ولا وزارة الإسكان هتسيب المشروع ده، احنا متابعين، لجنة الشباب منعقدة انعقاد دائم
و أشار مجاهد: “وبعد امضاء العقود هنقدر ندفع لنادي الزمالك في الأول 100 مليون جنية كمقدم، الجزء الاستثماري الخاص بأرض نادي الزمالك هينتهي خلال 3 سنين، والنادي كله بنسبة 100% خلال 5 سنين، وممكن الأعضاء يقدروا يروحوا النادي من أول سنة هيكون في نسبة انشاءات كبيرة ومنها الجزء الرياضي زي الملاعب وغيره”.
و تابع:” بعد أسبوعين أو 3 هنعرف المطور الاستثماري للزمالك، وهنعرف دفع مقدم كام، والشركات وافقت على المبدأ إنها تدفع مقدم للزمالك يحل أزمته، الفلوس مش من الزمالك، الموضوع استثمار، والنادي داخل باسمه، والدولة مدفعتش ولا هتدفع ولا جنيه، الدولة بتاخد حقها من الزمالك تمن الأرض مليار وكسور، والزمالك هيدفعهم كلهم بتكلم بوضوح الزمالك هيدفع ثمن الأرض كامله “.
واتم:” والجزء الاستثماري هيتباع فورًا، وجزء الزمالك مش هيتباع كله بل خلينا في نسبة التلت إيجار علشان يبقى في دخل ثابت للزمالك كل سنه وحاجه مستدامه وحسب العقود بقى بس بتتكلم أقل حاجه 150 مليون في السنه ده على التلت بس والتلت الثاني يدفع قيمة الأرض والثالث هيروح مقدم للنادي”.
